گاڤ

وەزیرێ دارایی و ئابۆری ل گەل تیمێ سەرپەرشتیار یێ پرۆژەیێ 'هەژماری من' کۆمبوو. وەزیرێ دارایی راگەهاند، "ئەو کێشەیێن د دەمێ بۆری دا ل بەنکێن ئەهلی هەین، پێدڤییە ب زویترین دەم بهێنە چارەکرن. "وەزارەتا دارایی ژی دبێژیت: "نێزیکی 10 هزار مووچەخۆران ماینە " د پرۆژەیێ 'هەژماری من' دا خۆ تۆماربکەن.

سێشەمبییێ 29ێ ئیلۆنا 2026ێ، ئاوات شێخ جەناب، وەزیرێ دارایی و ئابۆری پێشوازی ل تیمێ سەرپەرشتیار یێ پرۆژەیێ 'هەژمای من' ل نڤیسینگەها سەرۆکوەزیرێ هەرێما کوردستانێ کر.

ل گۆرەیی راگەهاندنا وەزارەتا دارایی و ئابۆری یا هەرێما کوردستانێ، د دیداره‌کێ دا کو هژمارەکا شیرەتکار و رێڤەبەرێن گشتی یێن وەزارەتێ تێدا د بەرهەڤ ببوون، "شیلان دۆسکی کورتییەک ل دۆر دویماهی قویناغێن بجهئینانا پرۆژەیی و گاڤێن ڤەگوهاستنا وی بۆ سەر وەزارەتا دارایی بەرچاڤکرن."

وەک د راگەهاندنێ دا هاتی، "وەزیرێ دارایی و ئابۆری رۆناهی ئێخستە سەر وان کێشەیێن د دەمێ بۆری دا ل بەنکێن ئەهلی هەین، کو پێدڤییە ب زویترین دەم بهێنە چارەکرن و خزمەتگوزارییێن پتر پێشکێشی فەرمانبەر و مووچەخۆرێن هەرێما کوردستانێ بهێنە کرن."

د پشکەکا دی یا کۆمبوونێ دا بەحس ل دویماهی گاڤێن تۆمارکرنێ، مفادارێن پرۆژەیی و دابینکرنا ئامیرەیێن راکێشانا پارەیی (ATM) هاتە کرن. وەزارەتا دارایی دبێژیت: "نوکە نێزیکی 10 هزار مووچەخۆران ماینە خۆ تۆمار بکەن، پتر ژ 750 ئامیرەیێن راکێشانا پارەیی هاتینە دانان و زێدەتر ژ ئێک ملیۆن مووچەخۆران ب شێوازێ دیجیتالی مووچەیێ خۆ وەردگرن."

ل دویماهییا کۆمبوونێ، وەزیرێ دارایی و ئابۆری بریار دا، "ب زویترین دەم ب رێیا لیژنەیەکا تایبەت یا وەزارەتێ دەست ب گاڤێن ڤەگوهاستنا پرۆژەیێ 'هەژماری من' بۆ سەر وەزارەتا دارایی و ئابۆری" بهێتە کرن.