گاڤ

فەرماندەیێ گشتییێ هێزێن چەکدار یێن ئیراقێ، ب فەرمی دویماهیک هاتنا ئەركێ هێزێن هەڤپەیمانییا نێڤدەولەتی یا دژی داعشێ ل ئیراقێ راگەهاند و سوپاسییا وەلاتێن دۆست و بەشدار د هەڤپەیمانییێ دا کر.

ئەڤرۆ رۆژا چارشەمبی، 30-9-2026ێ ل بەغدا و ب ئامادەبوونا فەرماندەیێن هەڤپەیمانییێ و پلەدارێن بلند یێن سەربازی و ئەمنی، ئاهەنگەکا فەرمی ب هەلکەفتا "ڕۆژا سەروەریێ" هاتە سازکرن.

د ڤێ هەلکەفتێ دا، عەلی فالح زەیدی، فەرماندەیێ گشتییێ هێزێن چەکدار یێن ئیراقێ گۆتارەک پێشکێش کر و راگەهاند: "ب دویماهیهاتنا ئەرکێ هەڤپەیمانییا نێڤدەولەتی بۆ بەرهنگاربوونا داعشێ رادگەهینین ژ بۆ کو بسەلمینین کو هاریکارییا د ناڤبەرا هێزێن دۆست و گەلێن دۆست سەرکەفتن ل سەر ئێک ژ تاڕیترین لاپەرێن تۆندرەوی و درندەییێ د دیرۆکێ دا بەستڤەئینا".

ئاماژە کر: "ئەڤرۆ ئیراق بەرهەمێ قوربانیێن مەزنێن هێزێن خۆ دچینیت، کو شیان کۆنترۆلا مەیدانی و ئەمنی ل سەر تەمەما ئاخا وەلاتی بسەپینن."

زەیدی دیار ژی کر: کو ب دویماهیک هاتنا ئەركێ هەڤپەیمانییێ ب رامانا دویماهیک هاتنا شەڕی دژ ب تیرۆرێ نینە، بەلکو ڤەگوهاستنا ئیراقێ یە بۆ قۆناغەکا نوی کو تێدا تەماما بەرپرسیارەتییا پاراستنا ئاسایش و سەروەریا وەلاتی دکەڤیتە سەر ملێن هێزێن ناڤخۆیی.

فەرماندەیێ گشتی گۆت ژی؛ هەماهەنگییا ئەمنی و تەکنۆلۆجی ل گەل وەلاتێن دۆست دێ بەردەوام بیت و راگەهاند کو ل بن دەستهەلاتا دەولەتێ دا هیچ چەکەک دەرڤەی دەستهەلاتا یاسایێ و هیچ هێزەک دەرڤەی سازییێن فەرمی نابیت.