گاڤ

سەرۆکوەزیرێن ئیراقێ، د پەیامەکێ دا ب هەلکەفتا دویماهیهاتنا ئەرکێ هێزێن هەڤپەیمان ل ئیراقێ راگەهاند؛ رۆژا 1ی چریا ئێکێ ئێکەمین گاڤا قۆناغەکا نوی یە بۆ چارەرکرنا پرسا چەکێ دەرڤەی کۆنتڕۆلا دەولەتێ.

عەلی زەیدی، سەرۆکوەزیرێن ئیراقێ د پەیامەکێ دا  پیرۆزباهی ل گەلێ ئیراقێ کر ب هەلکەفتا بدەستڤەئینانا سەروەرییا تەمام یا نشتمانی و ڤەکێشانا تەمام یا هێزێن هەڤپەیمان یێن ئاسمانی هشکاتی و دەریایی.

دەربارەی پرسا چەکی، عەلی زەیدی دوپات کر کو تا رۆژا 30-6-2027ێ دێ کێشەیا چەکێ نە یاسایی هێتە چارەرکرن ب ڕێکا نەخشەڕێیەکا دیار، هەروەسا حکومەت دێ کار کەت بۆ کۆمکرن و ژ چەککرنا هەمی گروپێن چەکدار یێن نەعێراقی ل سەر ئاخا وەلاتی تا سەقامگیری و ئاسایشا سنۆران بهێتە پاراستن.

زەیدی ئاماژە ب هەلویستێ ئیراقێ ژی کر بەرامبەر وەلاتێن جیران و گۆت: حکومەت پێگیرییا خۆ یا دەستووری دۆپات دکەت ڕێکێ نادەت ئاخ یان ئاسمانێ ئیراقێ بۆ کارەکێ ل سەر ئاسایشا وەلاتێن دی بهێتە بکارئینان.

سەرۆکوەزیرێ ئیراقێ دیار کر: دێ پشتەڤانییا سازیێن ئێمناهی کەین برێکا کڕینا سیستەمێ بەرگریا ئەسمانی و یاسایا حەشدا شەعبی پەسەند کەین، ئارمانجا ڤێ قۆناغا نوی ئاڤاکرنا پاشەرۆژەکا ئارام و جهگیر بۆ نفشێن بهێن و ب هێزکرنا ئاشتییا جڤاکی، سەقامگیری و باشترکرنا ئاستێ ژیارا وەلاتیانە.

د دویماهییا پەیاما خۆ دا، زەیدی  گۆت" ئێکی چریا ئێکێ نیشانا دەستپێکا قۆناغەکا نوی یە د رێرەوێ ئیراقێ دا، وەلاتەکێ خۆدان سەروەرییەکا تەمام ب سازیێن خۆ یێن بهێز، حوکمی ب دەستوور و یاسایێ و پرەنسیبێن یاسایا نێڤدەولتی دکەت، ڤەکرییە بۆ دەوروبەرێن خۆ یێن هەرێمی و نێڤدەولەتی ب پەیوەندیێن هەڤسەنگ و ئاڤاکری ل سەر بەرژەوەندییێن هەڤپشک و رێزگرتنا هەڤپشک".