شێروان تالب

د لڤینەکا بێ وێنە دا کو یا ڤالا نەبوو ژ پەیام و ئاماژەیێن جودا جودا یێن فرە ئارستە، سەرۆک نێچیرڤان بارزانی ب عەرەبی گۆتارا خۆ پێشکێشکر و ل بەغدا دیدگەها کوردی دەربارەی پاشەرۆژا ئیراقێ گەهاندە گوهێن وان هەمی کەسان یێن پێدڤییە گوهـ لێببن.

ب ئاشکرایی گۆتە هەمی کەسان: سەروەرییا دەولەتێ ڤەکێشانا هێزێن بیانی نینە، بەلکو سەروەری دەولەتەکە کو پشتبەستنێ ب دەستووری بکەت، دەولەتەکە فیدرالییا راستەقینە هەبیت، دەولەتەکە خودان بریارا خۆ بیت و یا ڤالا بیت ژ چەکێ بەرەلا و دەولەتەکە ب هەڤپشکی و شەراکەتا کوردان.

ئەوی دزانی پێدڤییە چ بکەت، ژبەر ڤێ یەکێ ڤێ جارێ کارێ خۆ رادەستی وەرگێری نەکر و هەر وی ب خۆ راستەوخۆ ئاخفتنا دلێ هەمی کوردان ب عەرەبی گۆت و د کورتترین پێناسەدا، سەروەرییا ئیراقێ ب چارەکرنا کێشەیێن هەولێر و بەغدایێ ڤە گرێدا و پاشی د ناڤدێرەکێ ژی دا گۆت: بلا ئێدی قەیران ژ نفشەکێ بۆ نفشەکێ دی دەرباز نەبن.