گاڤ

هەڤسەرۆکێ دەم پارتی رەخنەیێن تۆند ل سزادانا یانەیا ئامەد سپۆر دگریت و دیار دکەت کو بریارێن تورکیا بەرامبەر وێ یانەیێ رەگەزپەرستانەنە.

تونجەر باکرهان، هەڤسەرۆکێ پارتییا یەکسانی و دیموکراتییا گەلان (دەم پارتی) د دیدارەکێ دا رەخنەکا توند ل برێڤەبرنا کەرتی وەرزشێ و رەفتارێن رەگەزپەرستانە ل تورکیا گرت بەرامبەر یانەیا ئامەد سپۆرو ئاماژە کر کو فدراسیۆنا تەپاپێی و دەستەیا دادڤانان ل تورکیا ژ ئالییێ کەسێن بێسەروبەر و بێ شیان ڤە دهێنە برێڤەبرن، و دوپاتکر کو تا دیمۆکراسی بەرقەرار نەبیت، تەپاپێ یا پاقژ نابیت.

باکرهان هەروەسا رەخنە ل بێدەنگییا فدراسیۆنێ گرت بەرامبەر گەف و غەدرا ل یاریگەهان دژی ئامەد سپۆر دهێنە کرن و پرسیار کر، بۆچی دڤێت بەردەوام یانەیەکا کوردی تووشی دژایتییێ ببیت؟ هەروەسا رەخنە ل هەلبژارتییێ تەپاپێ یێ تورکیا ژی گرت کو رێکێ نادەتە یاریکەرێن کورد یێن کو ل ئەورۆپا دەنگڤەدایی پشکدارببن، تەنێ ژ بەر کو ئەو کوردن.

ئەڤە ل دەمەکی یە، لژنا رێککاری ل فدراسیۆنێ ب بەهانەیا بلندکرنا دروشمێن سیاسی، ب زێدەتر ژ 2.5 ملیۆن لیرێن تورکی ئامەد سپۆر سزادا، ئەڤ بریارە بوو ئەگەرێ نەرازیبوونا پشکەکا پەرلەمانتار و بەرپرسێن باکۆرێ کوردستانێ و وەک بەردەوامییا سیاسەتا فەرقوجوداهییێ هاتە قەلەمدان.

یانەیا ئامەد سپۆر کو ل خۆلا سۆپەرلیگ یا تورکیا نوینەراتییا باژێرێ ئامەدێ دکەت، پێشتر ژی ژبەر نڤیسینێن کوردی ل سەر درێسێن یاریزانان هاتبوو سزادان و بۆ چەندین سالان پشتەڤانێن وان ژ ئامادەبوونێ ل یاریگەهێن دەرڤە هاتبوونە قەدەغەکرن.