گاڤ
سەرۆکوەزیرێ ئیراقێ ئەڤرۆ خەلکێ ئیراقێ پشتراست کر کو بلندبوونا بهایێ دۆلاری بابەتەکێ دەمکی یە و دێ هێتە چارەکرن.
محەمەد شیاع سوودانی، سەرۆکوەزیرێ ئیراقێ ئەڤرۆ د کۆنگرەکێ رۆژنامەڤانی دا ل وەزارەتا بازرگانیا ئیراقێ گۆت: بلندبوونا بهایێ دۆلاری د بازاری دا بابەتەکێ دەمکی یە، هەردو رێڤەبەریێن ل بەنکا ناڤەندی و بەنکا بازرگانی هاتینە راسپارن دێ کار ل سەر کێمکرنا بهایێ دۆلاری کەن.
هەروەسا گۆت: وان پێرابوون ل دژی وان کەسێن کارتێکرنێ ل بازاری دکەن، گرتینە بەر و دێ هەموو پێدڤیێن بازاری ژی بۆ وەلاتیان هێنە دابینکرن.
سوودانی ئەڤرۆ سپێدێ وەک رێکارەک بۆ کێمکرنا بهایێ دۆلاری بەرانبەر دیناری، موستەفا غالب، پارێزگارێ بەنکا ناڤەندی ژکار لادا و عەلی عەلاق ل جهێ وی دانا، هەروەسا رێڤەبەرێ بەنکا بازرگانی ژی ژکارێ وی لادا و بیلال حەمدانی ل جهێ وی دانایە.