گاڤ

بازارێ تابووتان ل كه‌رتێ شانسى ل چينێ ژ به‌ر زێده‌بوونا حاله‌تێن مرنێ ب ڤايرۆسێ كۆرۆنايێ گه‌رم بوويه‌ و ل گۆره‌ى راپۆرتێن حكومى پتر ژ 13 هزار كه‌سان د حه‌فتيا بۆرى دا ب كۆرۆنايێ ژيانا خۆ ژده‌ستداينه‌.

راپۆرتێن رۆژنامه‌ڤانى ئاشكرا دكه‌ن؛ بازارێ تابووتان ژ به‌ر حاله‌تێن مرنێ ب ڤايرۆسێ كۆرۆنايێ ل كه‌رتێ شانسى ل چينێ گه‌رم بوويه‌ و ب زه‌حمه‌ت ب ده‌ست دكه‌ڤن، هه‌ڤده‌م ل گۆره‌ى ئامارێن حكومى پتر ژ 60 هزار حاله‌تێن مرنێ ب كۆرۆنايێ ل چينێ د هه‌يڤا كانوينا دوێ يا ئه‌ڤ ساله‌ دا تا نوكه‌ هاتينه‌ تۆماركرن.

ديار ژى دكه‌ن؛ گه‌له‌ك كه‌سان پيشه‌يا خۆ كرينه‌ دروستكرنا تابووتان و زه‌خره‌فه‌يان ل سه‌ر دروست دكه‌ن و ئاماژه‌يێ دده‌نه‌ وێ چه‌ندێ كو د هه‌يڤێن بۆرى دا وان ئه‌و ده‌مه‌ نه‌بوويه‌ ژ كارى براوه‌ستن.

وو زو نيۆ زانايێ په‌ژيكان د ڤى ده‌رباره‌ى دا دياركر؛ نزيكى 80% ژ خه‌لكێ چينێ، ئه‌و وه‌لاتێ پتر ژ 1.4 مليار كه‌سان تێدا دژين، هه‌ر ژ ده‌مێ سستكرنا رێكارێن به‌رسينگگرتنا كۆڤيد-19 ل ديسه‌مبه‌را بۆرى تووشى ڤايرۆسى بووينه‌.

چينێ ل حه‌فتيا بۆرى مرنا 13 هزار كه‌سان ب ڤايرۆسێ كۆرۆنايێ راگه‌هاند بوو هه‌روه‌سا د هه‌يڤا ئێكێ يا ئه‌ڤ ساله‌ دا تا نوكه‌ پتر ژ 60 هزار حاله‌تێن مرنێ ب ڤايرۆسى ل وه‌لاتى هاتينه‌ تۆماركرن.