گاڤ

فراکسیۆنا پارتی ل بەغدا بەیانەک دەربارەی بریارا دادگەها فیدرال یا هەلوەشاندنا بریارا جڤاتا وەزیران یا هنارتنا 400 ملیار دینارێن هەرێما کوردستانێ بەلاڤ کر و ئەو بریارە شەرمزار کر.

ڤیان سەبری، سەرۆکا فراکسیۆنا پارتی د کۆنگرەکێ رۆژنامەڤانی دا راگەهاند؛ پێدڤیبوو دادگەها فیدرال رەوشا سیاسی یا وەلاتی ل بەرچاڤ وەرگرتبوو و پشتەڤانیا لێکتێگەهشتن و پێگیریێان و ژینگەها ئەرێنی د ناڤبەرا حکومەتێن بەغدا و هەولێرێ بکەن ب بریارەکا پاراستنا مافێن پێکهاتەیان ل سەر بنەمایێ دەستووری و دادپەروەریێ، نەک بریارکێ بۆ بڕینا نانێ وەلاتیێن هەرێما کوردستانێ.

هەروەسا راگەهاند؛ حکومەتا نوی ب پشتەڤانیا هێزێن سیاسی و ل گۆرەی لێکتێگەهشتنان و پێگیریان، هەروەسا هەماهەنگیا د ناڤبەرا حکومەتا فیدرال و هەرێمێ دا دەربارەی بابەت و بریارێن گرێدایی هەرێما کوردستانێ و دویربوون ژ پێرابوونێن دژی هەرێمی هاتیە پێکئینان، هەروەسا چارەیێن یاسایی و دەستووری بۆ بابەتێ بودجێ و نەفتێ و مادەیێ 140 ژی د ناڤا وان لێکتێگەهشتنان دانە، لێ بریارا دوماهیێ یا دادگەها فیدرال دژی وان لێکتێگەهشتنانە و دوریانەکا مەترسیدار دئێختە سەر پرۆسەیا سیاسی.

هەروەسا داخواز ژ هەموو ئالیێن سیاسی کر هەلویستێن خۆ ئێکدەنگ بکەن و پشتەڤانیا پێگیریێن د رێککەفتنا سیاسی دا بکەن، هەروەسا داخواز کر لەز د دەرکرنا قانوونا نەفت و غازی، هەروەسا قانوونا دادگەها فیدرال ژی دا بهێتە کرن.