شیان کانیسارکی

ئەز ڤان پەیڤان دێ کەمە دیارى بۆ دو جۆرە کەسان، ئێک: ئەڤێن هەڤژینی پێکئینای، دو: ئەڤێن دێ ژنوی وێ پێنگاڤێ هاڤێژن. جۆرێ ئێکێ من دڤێت بێژمێ کو خودێ هەوە ئازا بکەت چونکی هەوە هەڤپشکێ/کا ژیانێ هەلبژارت و بۆری، ئانکۆ نەشێم دەستێ هاریکاریێ بۆ هەوە درێژ بکەم، لێ جورێ دووێ دشێم بێژم ئەو ژی دبنە دو چەق، کۆما ئێکێ یێن کەس"هەڤپشک"بۆ خۆ دەستنیانکرین (ئەو دشێن ل نیڤا رێکێ هشیارببن) و کۆما دووێ ئەڤێن هێژ چ هزر و سوحبەتێن پێکئینانا هەڤژینیێ نەهاتینە دسەرێ وان دا. بۆچی من ئەڤ بابەتە هەلبژارت؟ چونکی ئەز ب مشەیی دبینم دەمێ کەسەک بۆ خۆ کەسەکێ دبینیت دێ خێزانا وان "ب تایبەت؛ ژنێن مالێ" بێژنێ " کا تۆ بخۆدێ وێنێ وێ کایا جوانە" "بەژنا وێ یا بلندە؟ نەکو بسەرسەر تە بکەڤیت" "فلان جهێ خۆ نشتەرگەری بۆ کرییە؟"، نابێژنێ" چ دزانیت، رەوشتێ وێ یێ چاوایە، ژ مالەکا چاوایە، پرتووکان دخوینیت، یا خۆدێ نیاسە؟ خواندنا خۆ گەهاندە کیڤە؟" و ب دەهان پرسیارێن گرنگ ناهێنە کرن بتنێ فۆکسا خۆ د داننە سەر "بەژن و بالێ".

لەوڕا پشتی ژ جوانیێ تێر دبن"دبیت" ئەڤجا جهێ لەقا نامینیت ل دەستێ وی/وێ ئێدی شاخێن وان ژی ناهێن کۆ بچن ئاسمانا و پێ قوچا ل دیوارا بدەن! پۆشمانیێ چ مفایێ خۆ نینە، جوانی تشتەکە ب لەشی ڤە یا گرێدایە و دێ دەم بۆ دەمی پیراتی بسەرداهێت، ئەگەر هەرهەوە جوانی هەلبژارت بلا یا ژناڤدا" ناخی" بیت چونکی جوانیا "ناخی" بۆ خودانی دمینیت تا هەتایێ. نۆکە یا گرنگ ئارامیا دلی یە ئەگەر هەڤپشکا/کێ تە هەیڤا چواردە شەڤی بیت، بەژنا وێ/وی وەکی ڕیحانا بیت، چاڤێن وی/وێ دەریا بن و وەکی غەزالا بیت و یا/یێ ئەزمان خۆش بیت هەر رۆژ بۆتە هەلبەستا ب خوینیت،  لێ دلێ تە تژی بکەت ژ ئێشانێ و دەروونێ تە بکەت نهالەکا ئاگری و مال ل تە بکەت دۆزەخ، ئەو جوانی بۆچی یە؟ بۆچی یە ئەگەر تە نەڤیا بچی یە مال؟ چ مفا تێدا هەیە ئەگەر نڤستن لسەر جادێ خۆشتربیت ژمال(ددەمەکی دا پێدڤی یە خۆشترین و بێهنفرەهترین جهـ مالا تەبیت)! هیڤیدارم چ جاران ب جوانیێ و دەست سڤکییێ و خۆش چێکرنا خوارنان د سەردا نەچن، باشترە هەوە پرتەکا نانێ رەق ل گەل ئاڤەکا گەرم هەبیت بخۆن بتنێ دلێ هەوە یێ شاد بیت، نەکو بەژنا بلند بیت و مال. وەکی دبێژن" ژ دەرزیکێ تا کراسێ بویکێ یا تەمام بیت" و دلێ ژار و تژی بیت ژ ژانا. مێشکێ خۆ ڤەکە و هزرا خۆ باش بکە بەری تو پێنگاڤەکا شاش پاڤێژی، ب جوانیێ د سەردا نەچە چونکی د ڤی سەردەمی دا جوانی هەمی یا بوویە" دەستکرد"!. ئەڤە ژیانە ئەڤە هەڤپشکا/کێ ژیایێ، نە مۆبایلە دێ هەر هەیڤ گوهۆڕی نە جلکن دێ هاڤێژی.. ئەڤە ئێکە دێ هەتا هەتایێ ل گەل بی، ئەڤجا بلا تشتێن " سەرڤەسەرڤە" تە دسەردا نەبەن.