دو (كیان) د وهلاتهكێ دا...؟! چین وهك نموونه
کۆڤان حسێن
ئازراندنا پرسا دو كیانان د وهلاتهكێ دا، مانوورهيهكا سیاسى یا ژیرانه یا نێچیرڤان بارزانى سهرۆكێ ههرێمێ ب ئامادهبوونا د. حهیدر عهبادى نهیارێ سیاسى یێ سهرسهخت يێ مافێ چارهنڤيسێ كوردستانێ بوو.
ئهف بیرخستنه یا د جهێ خۆ دا بوو وهك بهرسڤ بۆ گهلهك دیتنان ئهوێن ب ههر ناڤ و بهایهكێ دڤێن كوردستانێ ژ شاكارێن سهروهریێ ڤالا كهن و جارهكا دى بهغدا ب ئێكسهر حوكمرانیا كوردستانێ بكهت، وهك هندهك ل ناڤخۆ ژى تابۆرهكێ بهێزن بۆ شرینكرنا ئيراقێ.
ب دیتنا من، بارزانى دويماهیك ب وێ چهندێ ئینا و دياركر كو كورد و كوردستانى جارهكا دى د بن ههر رهوش و كاودانهكێ دا بۆ پاش ناڤهگهڕن كو جارهكا دى كوردستان ببیته (شمالنا الحبیب).
ئهڤ پهیامه ژ سهرۆك نێچيرڤان بارزانى ب رامانتره ژ گۆتنا ههر سیاسیهكێ دى، چونكى ئيراق د ڤى وارى دا سهنگا بارزانى دروست دزانیت و ئهڤ دیتنا دیاركرى رهنگه هێڤێنێ چارهسهریهكا سیاسى بيت بۆ ئيراقهكا كۆنفيدرالى یان ژى وهك چینێ كو پتر ژ كیانهكێ د وهلاتهكێ دا ههنه (هۆنگ كۆنگ، ماكاو و چين) كو سهربۆرهكا تا رادهیهكێ سهركهفتیه و هۆنگ كۆنگ وهلاتهكێ نیمچه سهربخۆیه و ل جیهانێ دانپێدایه و ل ههمى سازى و مهحفهلان ژى ناڤ و ئالایێ خۆ ههیه لێ د بن سهروهریا (شكلى) یا چینێ دایه و چین بزاڤا هندێ ژى دكهت كو ههمان چارهسهرى بۆ تایوانێ ژى بهردهست بكهت.
ئانكۆ ئهڤ بیرخستنا دو كیانان د وهلاتهكێ دا، دبیت بۆ ڤێ قووناغێ گونجاى بیت، نهمازه ئهڤه بیست ساله ئيراقيان ب كورد و عهرهب ڤه شیانێن بجهئينانا دهستوورێ خۆ نینن، ئهڤه چارهسهریهكا نموونهیى يه بۆ ئيراقێ و كوردستانێ و دويماهیكه بۆ سهد سالێن بگروڤهكێشا سیاسى و سهربازى و دپلۆماسى دناڤبهرا كورد و عهرهبان دا.
ئيراق وهك ژ گۆتارا وێ دیار، چ پرۆژه بۆ چارهسهریێ نینن و ل هیڤیا دهرفهتهكێ یه ب ههمى هێزا خۆ ڤهگهڕیت كوردستانێ و دويماهیكێ ب ڤى كیانى بینیت ئهگهر دهرفهت ههبیت، كوردان ژى زێدهتر تشتهك نهمایه بازارى ل سهر بكهن یان سازشێ ل سهر بكهن، ژبلى وێ كوردان مافێ چارهنڤيسێ خۆ جارێ سڕكريه، ئهو ژى بۆ دهرفهتهكا دى.
شێوازێ دو كیانان د ئێك وهلاتى دا دێ یا سهركهفتنى بیت، لێ ب شێوهكێ فهرمى و ب رازيبوونا ههمى ئالیان.