بۆچى ئسرائیل نه‌وێریت ل ئیرانێ بده‌ت؟
بەلاڤ بکە
گاڤ
ڕۆژنامەیا "ئۆرشەلیم پۆست"یا ئسرائیلی د راپۆرته‌كێ دا ئاماژه ب وێ ئێكێ كرى یه،حكومه‌تا ئیرانێ د وێ باوه‌رێ دایه ئسرائیلێ چه‌كێ پێدڤى نینه هێرشى ئیرانێ بكه‌ت، سه‌ربارى ڤێ ئێكێ ژى نها حكومه‌تا بنیامین نه‌تانیاهۆى پڕه ژ قه‌یرانان و دگه‌ل ئه‌مریكا و ئه‌ورۆپیان ژى بۆ چه‌وانیا به‌رهنگاربوونا ئیرانێ نه هه‌ڤڕایه.
د راپۆرتا شیكاریا رۆژنامه‌یا ئسرائیلى دا هاتى یه، ئیران د وێ باوه‌رێ دایه، جبه‌خانه‌یێن ئسرائیلێ ژبه‌ر ڤان شه‌ڕێن داویێ دگه‌ل گرۆپێن فلستینى ڤالا بووینه و د نها دا ئسرائیلێ چ به‌رهه‌ڤى بۆ لێدانا ته‌هرانێ نینن، ژبه‌ر ڤێ ئێكێ داخۆیانیێن مه‌زنه به‌رپرسێن ئسرائیلی ل دۆر لێدانا ئیرانێ چ بنه‌ما نینن.
هه‌روه‌سا ئیران د وێ باوه‌رێ دایه ئسرائیلێ دگه‌ل ئه‌مریكا و وه‌لاتێن ئه‌ورۆپى سیاسه‌ته‌كا رۆهن بۆ به‌رهناگاربوونا ئیرانێ نینه، ئه‌ڤه ژى وێ ئێكێ دگه‌هینیت چ بژارده‌یێن سه‌ربازى دژى وى وه‌لاتى د رۆژه‌ڤێ دا نینن.
دبێژیت ژى، خالا سه‌ره‌كى ل ده‌ڤ ئیرانێ ئه‌وه كو ده‌ستهه‌لاتدارێن وى وه‌لاتى وه‌سا دبینن، دوبه‌ره‌كیا دناڤ جڤاكا ئسرائیلێ دا، توندوتیژیێن نها یێن كه‌رتێ رۆژئاڤا، دژاتیا رۆژئاڤا بۆ بالێ راستڕه‌وێ توند یێ حكومه‌تا نه‌تانیاهۆى و فێربوون ژ وانه‌ێن ململانێیا سالا 2021ێ ل غه‌ززه، هه‌مى وێ واته‌یێ دگه‌هینن كو رویدانا ململانا سه‌ربازى دژى ته‌هرانێ به‌ره‌ڤ لاوازیێ یه.
رۆژنامه‌یێ ژ ئه‌مریكا ژى خواستیه هاریكار بیت بۆ بهێزكرنا شیانێن سه‌ربازیێن ئسرائیلێ ب ره‌نگه‌كى بشێت خۆ همبه‌ر مه‌ترسیێن ئیرانێ بپارێزیت كو به‌ره‌ڤ زێده‌بوونێ دچن.
رۆژنامه د وێ باوه‌رێ دایه، ئیران ب پشتبه‌ستن ب هه‌لسه‌نگاندنا دزگه‌هێن راگه‌هاندنا ئسرائیلێ و رۆژئاڤا گه‌هشتیه وى ئه‌نجامى كو د ڤان سالێن داویێ دا ئسرائیل بۆ لێدانا گورزه‌كێ سه‌ربازى دژى ئیرانێ پتر دو دل بوویه.
ل همبه‌ر ژى ئیرانێ شیانێن مۆشه‌كى و فرۆكه‌یێن بێفرۆكه‌ڤانێن خۆ ب ره‌نگه‌كى بهێزكرینه كو بشێت پترین هژمارا مۆشه‌كان بكار بینیت.
