کێشە بۆ مەزاختنا پارێ بەلێندەرێن دهۆکێ دهێنە دروستکرن
گاڤ - تایبەت
دو سالن پتری 11 ملیار دینارێن بەلێندەرێن دهۆکێ بووینە چەکێن پارەی، لێ ناهێنە خەرجکرن و گاڤ زانیاریێن تایبەت بەلاڤ دکەت.
 بەرێ بنیاتی بۆ دەهان پرۆژەیێن خزمەتکاری ل دهۆکێ هاتیە دانان، لێ ل گۆرەی زانیاریێن گاڤ، سەرەرای دەستپێکرنا پرۆژەیان، لێ ژبەر گیرۆبوونا دانا پارەی هژمارەیەکا پرۆژەیان ماینە هەلاویستی.
ئێک ژ بەلێندەرێن دهۆکێ کو نەڤیا ناڤێ خۆ دیاربکەت بۆ گاڤ ئاشکراکر؛: ئەز ئێک ژ وان بەلێندەرامە کو من نوکە پرۆژەیێن خۆ نیڤەرۆ هێلاینە و گۆت: نزیکی دو سالایە 11 ملیار و 500 ملیۆن دینارێن بەلێندەرێن دهۆکێ بووینە چەک، لێ بەنک پارەی نامەزێخیت و کاریگەریەکا مەزن ئێخستیە سەر مۆرالا بەلێندەران و برێڤەچوونا پرۆژەیان خاڤ بوویە یان راوەستیاینە.
زانیاریێن تایبەتێن گاڤ ئاماژەیێ ددەنە وێ یەکێ کو ژ هەیڤا 12 یا سالا بۆری وەرە رازیبوون ل سەر ملیارەک و 700 ملیۆن دیناران بۆ بەلێندەران هاتبوودان، لێ ب فەرمانا دیوانا جڤاتا وەزیران بەلاڤکرنا وی کۆژمەی ژی لسەر بەلێندەران هاتیە راگرتن.
وی بەلێندەری دیارکر؛ کارگێریا پارێزگەها دهۆکێ نەشیایە فشارێ بێخیتە سەر وەزارەتا دارایی و سەرۆکێ دیوانا جڤاتا وەزیران ب مەرەما خەرجکرنا پارەیێ بەلێندەرێن دهۆکێ.
زیرەک دۆسکی، سەرۆکێ لقێ دهۆکێ یێ ئێکەتیا بەلێندەرێن کوردستانێ بۆ گاڤ دیارکر؛ زەرەرمەندترین بەلێندەر ل کوردستانێ یێن دهۆکێ نە، تنێ پارێ قەیرانا ئابۆریا یا پشتی شەرێ داعش نزیکی 195 ملیار دینار و 54 ملیۆن دۆلار یێن بەلێندەرێن دهۆکێ ل دەف حکومەتێ ماینە و هێشتا نەداینە.