چه‌وا رژێما ئه‌سه‌دى بزاڤان دكه‌ت ئه‌ردهه‌ژێ د به‌رژه‌وه‌نديا خۆ دا بكاربينيت؟
بەلاڤ بکە
گاڤ – راپۆرتا شڕۆڤه‌كارى
هاريكاريێن نێڤده‌وله‌تى بۆ سووريا پشتى ئه‌ردهه‌ژێ و فشارێن رژێما ئه‌سه‌دى ل سه‌ر ئاژانسێن گرێداى نه‌ته‌وه‌يێن ئێكگرتى بووينه جهێ ئاماژه‌پێدانێ و ئاژانسه‌كا سياسى يا نێڤده‌وله‌تى ئاماژه‌يێ دده‌ته مايتێكرنا تايێن رژێما ئه‌سه‌دى و هه‌والگيريا رژێمێ د كاروبارێن ئاژانسێن فرياگۆزاريێ يێن نێڤده‌وله‌تى دا و دانانا كچا حوسام لوقاى رێڤه‌به‌رێ هه‌والگيريا ئه‌سه‌دى يێ كو د ليستا سزايان يا ئه‌مريكى و ئه‌ورۆپى دايه د ئاژانسه‌كا هاريكاريێن مرۆڤايه‌تى يا يۆ ئێنێ دا.
رژێما ئه‌سه‌دى و بكارئينانا هاريكاريێن نێڤده‌وله‌تى د به‌رژه‌وه‌نديا خۆ دا
رژێما ئه‌سه‌دى هه‌ر ژ ده‌مێ ده‌ستپێكرنا شه‌ڕى ل سووريا و تا دگه‌هيته ئه‌ردهه‌ژا 6ى هه‌يڤا شوباتا بۆرى، كار ل سه‌ر سه‌ره‌ده‌ريێ ل گه‌ل هاريكاريێن هه‌وارهاتنێ و يێن نێڤده‌وله‌تى ل گۆره‌ى به‌رژه‌وه‌نديێن خۆ دكه‌ت، ل گۆره‌ى راپۆرته‌كێ.
د راپۆرته‌كا فاينانشيال تايمز دا هاتيه؛ هه‌ر ئێك ژ رژێما ئه‌سه‌دى و نه‌ته‌وه‌يێن ئێكگرتى د گه‌هاندنا هاريكاريان دا بۆ زيانڤێكه‌فتيێن ئه‌ردهه‌ژێ ل باكۆرێ سووريا سه‌رنه‌كه‌فتينه.
راپۆرتێ ب پشتبه‌ستن ل سه‌ر دانپێدانێن كه‌سايه‌تێن ناڤدار د يۆ ئێنێ دا دياركريه كو هاريكاريێن مرۆڤايه‌تى ب هێواشى دگه‌هنه ده‌ڤه‌رێن د بن كونترۆلا ئوپوزيسيۆنا سوورى دا و رژێما ئه‌سه‌دى هاريكاريێن نێڤده‌وله‌تى د به‌رژه‌وه‌نديا خۆ دا بكاردئينيت.
هه‌روه‌سا ژ فه‌رمانبه‌رێن فرياگۆزاريێ ڤه‌گوهاستيه؛ رژێما ئه‌سه‌دى يۆ ئێنێ نه‌چار دكه‌ت كو داگيڕانێن د به‌رژه‌وه‌نديا رژێمێ و هه‌ڤپه‌يمانێن وێ دا پێشكێش بكه‌ت.
دانانا كه‌سێن نزيك ژ رژێمێ د ئاژانسێن نێڤده‌وله‌تى دا
ل گۆره‌ى هنده‌ك دێكيۆمێنتان، نه‌ته‌وه‌يێن ئێكگرتى ژ به‌رى نوكه هنده‌ك كه‌سێن نزيك ژ رژێما سوورى د ئاژانسێن هاريكارێن مرۆڤايه‌تى دا دامه‌زراندينه.
مالپه‌رێ Soshals به‌لاڤكريه؛ كچه‌كا حوسام لوقاى رێڤه‌به‌رێ گشتى يێ هه‌والگيريا سوورى د ئۆفيسا سندۆقا ناڤه‌ندى يا فرياگۆزاريێ يا گرێداى نه‌ته‌وه‌يێن ئێكگرتى دا ل ديمه‌شقێ هاتيه دامه‌زراندن.
ديار ژى كريه؛ حوسام لوقا ژ به‌ر ده‌ستدرێژيێن ل سه‌ر مافێ مرۆڤى، د ليستا سزايان يا ئه‌مريكا، ئێكه‌تيا ئه‌ورۆپا و بريتانيا دايه.
فه‌رمانبه‌ره‌كێ فرياگۆزاريێ يێ نه‌ته‌وه‌يێن ئێكگرتى ل دۆر ڤێ چه‌ندێ بۆ فاينانشيال تايمز ئاشكرا كر؛ گه‌له‌ك جاران به‌رپرسێن حكومى يێن سوورى هاتينه د ئۆفيسێن نه‌ته‌وه‌يێن ئێكگرتى ڤه دا كو فشارێ ل سه‌ر مه بكه‌ن كو كه‌سوكارێن وان د ئاژانسێن خۆ دا بدامه‌زرينين.
راپۆرتا فاينانشيال تايمز ئه‌و ئێك ژى نه‌ڤه‌شارتيه؛ يۆ ئێن سالانه ب مليۆنان دۆلاران ژ بۆ ئاكنجيبوونا فه‌رمانبه‌رێن خۆ ل سووريا دمه‌زێخيت و ژ سالا 2014 تا نوكه پتر ژ 81 مليۆن دۆلاران ژ بۆ تێچوويێن ئاكنجيبوونا فه‌رمانبه‌رێن خۆ ل هۆتێلا ’فۆر سيزنس’ يا بزنسمان سامر فه‌وز مه‌زاختينه.
فه‌وز ژى و هۆتێلا وى ژ به‌ر په‌يوه‌نديێن وى ل گه‌ل رژێما ئه‌سه‌دى، هه‌ر ژ سالا 2019 د ليستا سزايان يا ئه‌مريكى دايه
سه‌پاندنا مه‌رجان ل سه‌ر ئاژانسێن نه‌ته‌وه‌يێن ئێكگرتى
رژێما ئه‌سه‌دى رێكه‌كا دى ژى بۆ په‌يداكرنا داهاتى ب رێكا ئاژانسێن نێڤده‌وله‌تى يێن گه‌هاندنا هاريكاران بده‌ستڤه‌دئينيت.
مالپه‌رێ Soshals به‌لاڤكريه؛ رژێما ئه‌سه‌دى ب مليۆنان دۆلاران ژ هاريكاريێن نێڤده‌وله‌تى بده‌ستڤه‌دئينيت ئه‌و ژى ب رێكا نه‌چاركرنا ئاژانسێن نێڤده‌وله‌تى يێن هاريكاريان ب بهايێ ليره‌يا سوورى يا كو رژێما سوورى بۆ وان ده‌ستنيشان دكه‌ت.
ديار ژى كريه؛ ئاژانسێن نێڤده‌وله‌تى ژ ترسا رێگرتنا رژێمێ ل گه‌هشتنا هاريكاريان بۆ كه‌سێن پێدڤى، ب مه‌رجێن رژێما ئه‌سه‌دى رازى بووينه.
"ئاژانسێن هاريكاريان يێن نێڤده‌وله‌تى يان دڤێت ل گۆره‌ى رێسايێن رژێمێ كار بكه‌ن يان ژى رازيبوون ل سه‌ر گه‌هاندنا هاريكاريان بۆ سووريا ناهێته دان"، فاينانشيال تايمز دياركريه.
نه‌چاركرن ب هه‌ماهه‌نگيێ ل گه‌ل تايێن رژێمێ
فه‌رمانبه‌رێن فرياگۆزارى و ئاژانسێن هاريكاريان يێن نێڤده‌وله‌تى دهێنه نه‌چاركرن كو هه‌ڤپشكيێ ل گه‌ل ئاژانسێن گرێداى رژێما ئه‌سه‌دى پێكبينن.
راپۆرتا Soshals دياركريه؛ ئاژانسێن سه‌ره‌كى يێن هاريكاريێن مرۆڤايه‌تى يێن گرێداى رژێما ئه‌سه‌دى ژ هه‌ر ئێك ژ هه‌يڤا سۆر يا عه‌ره‌بى يا سوورى و سندۆقا گه‌شه‌پێدانێ يا سوورى پێكدهێن.
هه‌يڤا سۆر يا سوورى ژ لايێ خالد حبوباتى، ئه‌و كه‌سێ نزيك ژ ئه‌سه‌دى ڤه دهێته برێڤه‌برن.
هه‌روه‌سا سندۆقا سوورى يا گه‌شه‌پێدانێ ژ لايێ ئه‌سما ئه‌سه‌د هه‌ڤژينا ئه‌سه‌دى ڤه دهێته برێڤه‌برن.
"هه‌مى بزاڤێن ده‌سته‌يێن يۆ ئێنێ و هه‌مى پرۆگرامێن هاريكاريێن وان ل سووريا، پێدڤيه ب رازيبوونا رژێمێ و تايێن هه‌والگيريێ بن"، ل گۆره‌ى راپۆرتێ.
هه‌ر ژ ده‌مێ ده‌ستپێكرنا شۆڕه‌شێ ل سووريا ل سالا 2011، ب ملياران دۆلار ژ لايێ نه‌ته‌وه‌يێن ئێكگرتى ڤه وه‌ك هاريكاريێن مرۆڤايه‌تى بۆ خه‌لكێ سووريا هاتينه ته‌رخانكرن.
هه‌روه‌سا پشتى هه‌ردو ئه‌ردهه‌ژێن ل 6ى شۆباتا بۆرى ل توركيا و سووريا داين، هاريكاريێن نه‌ته‌وه‌يێن ئێكگرتى و يێن نێڤده‌وله‌تى بۆ هاريكاريا زيانڤێكه‌فتيان د به‌رده‌وامن.
