سه‌رۆك نێچیرڤان بارزانى: ژبلى چاره‌كرنا كێشه‌یان، هه‌ولێر و به‌غدایێ چ رێكێن دى نینن
بەلاڤ بکە
گاڤ
سه‌رۆكێ هه‌رێما كوردستانێ راگه‌هاند، ژبلى چاره‌كرنا كێشه‌یان د ناڤبه‌را هه‌ولێر و به‌غدایێ دا چ رێكێن دى ل همبه‌رى هه‌ر دو ئالیان نینن.
ئه‌ڤرۆ 18-3-2023ێ یێ به‌رى نیڤرۆ نێچیرڤان بارزانى، سه‌رۆكێ هه‌رێما كوردستانێ ل گه‌ل ماوریتزیۆ گریگانتى، بالیۆزێ ئیتالیا ل ئیراقێ كۆمبوون به‌رده‌وامیدان ب په‌یوه‌ندیێن هه‌رێما كوردستانێ و ئیتالیا و ل گه‌ل په‌یوه‌ندیێن هه‌ولێر و به‌غدایێ و چاره‌كرنا كێشه‌یان دانوستاندانا هه‌ر دو ئالیان بوو.
سه‌رۆك نێچیرڤان بارزانى زێده‌بارى ده‌ربڕینا سوپاسى و پێزانینان بۆ پشته‌ڤانیا ئیتالیا ل ئیراق و هه‌رێما كوردستانێ، راگه‌هاند، سه‌قایه‌كێ ئه‌رێنى د ناڤبه‌را هه‌ولێر و به‌غدایێ دا هه‌یه و پێنگاڤێن نوكه یێن حكومه‌تا ئیراقا فیدرال جهێ ده‌ستخۆشیێ و ئۆمێدانه، هه‌روه‌سا دوپاتكر، به‌غدا هه‌ڤپشكا سه‌ره‌كى یا هه‌رێما كوردستانێ یه و ژبلى چاره‌كرنا كێشه‌یا چ رێكێن دى ل همبه‌رى هه‌ر دو ئالیان نینن.
ژ ئالیێ خۆ ڤه بالیۆزێ ئیتالیا دیدارا سه‌رۆك نێچیرڤان بارزانى ل گه‌ل وه‌زیرێ وه‌لاتێ خۆ ل كۆنفرانسێ مه‌ها بۆرى یێ مێنشن ب ئه‌رێنى ل قه‌له‌م دا و دوپاتكر، چاره‌كرنا كێشه‌یێن هه‌ولێر و به‌غدایێ دێ بنه ئه‌گه‌ر كۆمه‌لگه‌ها نێڤده‌وله‌تى زێده‌تر به‌ره‌ف ئیراق و هه‌رێما كوردستانێ بهێت، وارێ سه‌رمایه‌گۆزارى، وه‌به‌رهێنانانا بیانى ل ئیراق و هه‌رێما كوردستانێ ژى دێ زێده‌تر بیت.
پۆختا كارى، چالاكیێن ئیتالیا ل ئیراق و هه‌رێما كوردستانێ، ره‌وشا ناوچێ ب گشتى، چه‌ندین پرسێن جهێ پویته‌دانا هه‌ر دو ئالیان ته‌وه‌رێن دى یێنن كۆمبوونێ بوون كو كونسلێ ئیتالیا ل هه‌رێما كوردستانێ ژى ئاماده‌یى كۆمبوونێ بوو.
