ل خه‌وا زارۆكێن خۆ هشیار بن، نیڤ ده‌مژمێر ژى گه‌له‌كه
بەلاڤ بکە
گاڤ
ڤه‌كولینه‌كا نوى یا نوشدارى هوشداریێ ژ كێمخه‌ویا زارۆكان دده‌ت و دیار دكه‌ت خه‌وا زارۆكان ب وێ ساده‌یێ نینه كو گه‌له‌ك ژ دایك و بابان هزر تێدا دكه‌ن، خۆ ئه‌گه‌ر په‌یوه‌ندى ب نیڤ ده‌مژمێرێ ژى ڤه بیت. چونكى ئه‌و زارۆكێن تێر نه نڤن توشى نه‌خۆشیێن ترسناك دبن.
ڤه‌كوله‌رێن نیوزله‌ندا، ڤه‌كولینه‌ك ئه‌نجامدایه كو 100 زارۆكێن ژیێ وان دناڤبه‌را 8 بۆ 12 سالیێ بخۆڤه گرتینه و تێدا دیاربوویه، كێمبوونا ده‌مژمێرێن خه‌وێ كاریگه‌ریا نه‌رێنى و به‌رچاڤ لسه‌ر ساخله‌میا زارۆكى هه‌یه.
د ڤه‌كولینێ دا هاتیه ئاشكراكرن، كێمبوونا ماوه‌یێ نڤستنێ ب رێژه‌یا 39 خوله‌كان ب تێكرایی بۆ ماوه‌یێ هه‌فتیه‌كێ دبیته ئه‌گه‌رێ خراببوونا ره‌وشا ساخله‌میا زارۆكى و كاریگه‌ریێ لسه‌ر ده‌ستكه‌فتێن وى ل قوتابخانێ و كوالیتیا ژیانا زارۆكى ب گشتى دكه‌ت.
وێ ڤه‌كۆلینێ دوپاتى ل وێ ئێكێ كرى یه ده‌یك و باب ل زارۆكێ خۆ هشیار بن كو پێدڤى یه هه‌ر شه‌ڤ ل ده‌مێ خۆ یێ ده‌ستنیشانكرى بنڤیت و نابیت دگه‌ل دا نه‌رم بن و بهێلن زارۆك بمیننه لبه‌ر موبایل و ته‌له‌ڤزیۆنان.
ژلایه‌كێ دیڤه و ل گۆره‌ى داتایێن نه‌خۆشخانه‌یا ویلایه‌تا كولۆرادۆ یا ئه‌مریكى، ئه‌و زارۆیێن تێر نا نڤن، خاڤبوونا گه‌شه‌كرنا وان ل ناوچه‌یا مێشكى پتره، هه‌روه‌سا كێشه‌یا فێربوونێ هه‌یه و دبیت هه‌ستێن نه‌رێنى هه‌بن. هه‌روه‌سا دبیت كێمخه‌ویا زارۆكى ببیته ئه‌گه‌رێ تێكچونا سه‌نگا زارۆكى و زارۆكێن بچویك پتر به‌رهه‌ڤیا نه‌خۆشكه‌فتنێ هه‌یه.
