"ژ به‌ر سێداره‌دانا سوپایێ پاسداران بۆ هه‌ڤاله‌كێ وى.. مانگرتن ژ خوارنێ راگه‌هاند"

بەلاڤ بکە

 

گاڤ

وه‌لاتیه‌كێ بریتانى یێ ب ره‌گه‌ز ئیرانى مانگرتن بۆ ده‌مێ 27 رۆژان ژ خوارنێ ژ به‌ر ره‌ڤاندنا سوپایێ پاسداران بۆ هه‌ڤاله‌كێ وى و سێداره‌دانا وى راگه‌هاند.
رۆژنامه‌یا گاردیان به‌لاڤكریه‌؛ وه‌حید به‌هه‌شتى ده‌ست ب مانگرتنه‌كا 27 رۆژى ل به‌رانبه‌ر ئاڤاهیێ وه‌زاره‌تا ده‌رڤه‌ یا بریتانیا ژ بۆ داخوازكرنا پۆلینكرنا سوپایێ پاسداران د لیستا تیرۆرێ دا كریه‌.
دیار ژى كریه‌؛ به‌هه‌شتى تا نوكه‌ بۆ ده‌مێ 6 رۆژانه‌ د مانگرتنێ دا و ب تنێ ئاڤێ و قه‌هوه‌یه‌كێ ل سپێدێ ڤه‌دخۆت.
مانگرتنا به‌هه‌شتى هه‌ڤسۆزیه‌ ل گه‌ل روحه‌للا زم هه‌ڤالێ وى كو ل سالا 2020 ل ئیراقێ ژ لایێ سوپایێ پاسداران ڤه‌ هاتبوو ره‌ڤاندن و پاشى هاتبوو زیندانكرن و سێداره‌دان، ل گۆره‌ى رۆژنامه‌یێ.
به‌هه‌شتى ل سه‌ر تۆڕا تویته‌رى نڤیسیه‌ "ئه‌ز دێ د مانگرتنا خۆ دا به‌رده‌وام بم تا كو حكومه‌تا بریتانیا سوپایێ پاسداران دكه‌ته‌ دناڤ لیستا تیرۆرێ دا".
بریتانیا تا نوكه‌ ژماره‌یه‌كا سزایان ل سه‌ر سوپایێ پاسداران سه‌پاندینه‌ لێ تا نوكه‌ ب فه‌رمى نه‌كریه‌ دناڤ لیستا تیرۆرێ دا.
په‌رله‌مانێ ئه‌ورۆپى ل هه‌یڤا كانوینا دوێ یا بۆرى داخواز ژ ئێكه‌تیا ئه‌ورۆپى كربوو كو ژ به‌ر سه‌ركۆتكرنا خۆنیشانده‌ران ل ئیرانێ و دانا درۆنان ب رۆسیا، سوپایێ پاسداران بكه‌ته‌ دناڤ لیستا تیرۆرێ دا.

زێدەتر دەربارەی