لوبنان.. ژمارهیهكا خۆنیشاندهران بریندار بوون
گاڤ
خۆنیشاندان ل لوبنانێ ژ بهر گرانبوونا بهایێ كهلوپهلان د بهردهوامن و ئهڤرۆ چارشهمبیێ ژمارهیهكا خۆنیشاندهران ژ بهر بكارئینانا هێزێن ئهمنى بۆ گازێن رۆندكرێژ و توندیێ بریندار بوون.
ئاژانسا نووچهیان یا لوبنانى راگههاند؛ هێزێن ئهمنى یێن لوبنانى گازێن رۆندكرێژ بۆ ژێكجوداكرنا ب سهدان خۆنیشاندهران و پتریا وان ژ خانهنشینێن لهشكهرى بوون بكارئینان.
خۆنیشادهران بزاڤ دكرن ژ دیوارێ بهرهڤ بارهگایێ حكومهتێ ل نیڤا بهیرۆتێ دچیت دهرباز ببن وهك نهرازیبوون ل سهر كێمبوونا بهردهوام یا بهایێ لیرهیا لوبنانى، گرانبوونا بهایێ كهلوپهران و بلندبوونا تێكرایێن ههلئاوسانێ.
ئاژانسێ دیار ژى كریه؛ دهنگێ ئهمبۆلانسان ل دهوروبهرێن خۆنیشاندانێ دهاته گوهلێبوون و ژمارهیهكا خۆنیشاندهران بریندار بوون.
ئهسوشیهیتد پرێس بهلاڤكریه؛ دوهى سێشهمبیێ ژى خۆنیشاندهران ژمارهیهكا رێكان ل لوبنانێ وهك نهرازیبوون ل سهر نزمبوونا بهایێ لیرهیێ گرتبوون.
لوبنان د مهزنترین قهیرانا ئابوورى و دارایى د دیرۆكا خۆ یا ههڤچهرخ دبۆریت و لیرهیا لوبنانى پتر ژ 15% ژ بهایێ خۆ ژدهستدایه و بهایێ دۆلارهكێ گههشتیه پتر ژ 140 هزار لیرهیان.
ههر ژ دهمێ تێكچوونا رهوشا ئابوورى ل لوبنانێ ل سالا 2019، سێ چارێكێن خهلكێ وێ كو ژمارهیا وان پتر ژ 6 ملیۆن كهسایه و ژ وان ژى ئێك ملیۆن پهنابهرێن سوورى نه، د ههژاریێ دا دژین.
ههڤدهم تێكرایێن ههلئاوسانێ د بلندبوونهكا بهردهوام دانه و بهایێ لیرهیێ د نزمبوونێ دایه.