گاڤ

رێڤه‌به‌ریا كاروبارێن خۆپاراستنا ساخله‌میا دهۆكێ هه‌ژماره‌كا رێنمایان بۆ مه‌ها ره‌مه‌زانا ئه‌ڤ ساله‌ 2023ێ یێ به‌لاڤكرن و راگه‌هاند، هه‌ر جهه‌كێ وان رێنمایان بجهـ نه‌ئینیت دێ هێته‌ سزادان.

رێنمایێن رێڤه‌به‌ریا كاروبارێن خۆپاراستنا ساخله‌میا دهۆكێ

شەربەت ب گشتی:

1. دڤێت هەمی جهێن چێکرنا شەربەت و تەزیاتیان ئامیرێن پارزنین و تافلیکرنا ئاڤێ (تصفیة و تعقیم) ب قەبارێن مەزن بدانن بۆ جهێن خۆ بۆ دابینکرنا ئاڤەکا ساخلەم بۆ شویشتنا ئامان و ئامیرێن کاری و ئامادەکرنا شەربەتا و هەمی جۆرێن گڤاشتیا (عصائر).
2. ئامیرێن پارزنینێ دڤێت بەردەوام کاربکەن داکو تافیلکرنا ئاڤی ب شێوەکێ دروست بهێتە کرن و دڤێت بەردەوام فیلتەرێن ڤان ئامیران بهێنە گوهارتن ل دویف پێدڤی و قەبارێ کاری.
3. دڤێت شەربەت د ناڤ تەزیکەران دا بهێنە هەلگرتن و دانان و نابیت ب هیچ رەنگەکی ل سەر ستێرکا و ژ دەرڤەیی دکانێ بهێنە دانان.
4. دڤێت بتنێ بۆ رۆژەکێ شەربەت بهێتە دروستکرن و ئامادەکرن و نابیت بمینیت بۆ رۆژا پاشتر و ئەگەر ما دڤێت بهێتە ژناڤبرن و بۆ کۆنترۆلکرنا ڤێ چەندێ دڤێت مێژوو لسەر بتلێن شەربەتێ بهێتە نڤێسان.
5. نابیت شەربەت ل سەر عەرەبانان و لسەر شوستەیان بهێتە دانان و فرۆشتن .
6. فێقیێ تایبەت بۆ گڤاشتنێ دڤێت باش بهێنە شویشتن و زوهاکرن پاشی د ناڤ تەزیکەران دا بهێنە پاراستن.
7. شەربەتا مێویژا دێ رێک بۆ هێتە دان بۆ ئامادەکرنێ و فرۆشتنێ ل جهێن دەستویردایى و ل دویف ڤان مەرج و رێنمایێن تایبەت ب شەربەتا مێویژان ڤە یێن هەڤپێچ .
8. نۆرماله‌ شەربەت ل مارکێت و دوکانان ژی بهێتە فرۆشتن لێ دڤێت ژ جهەکێ دەستویردای ڤان شەربەتان بینن و لێبلێ جهێ چێکرنا شەربەتێ ل سەر بیت و ل جهەکێ گونجای بهێتە هەلگرتن و یا د مینیت بۆ رۆژا پاشتر بهێتە ژناڤبرن.

شریناهی و هەڤیر:

1. نابیت و قەدەغەیە هەمی جورێن شریناهیان و هەڤیران بهێنە چێکرن ژبلی کارگەهێن شریناهیان یێن دەستویریا ساخلەمیێ هەی و ل دەمێ بەلاڤکرنێ ژی دڤێت لێبلێ کارگەهێ و مێژوویا چێکرنێ و سەرڤەچوونێ ب ئاشکرایی ل سەر بەرهەمێن وان بن.
2. نابیت ب هیچ رەنگەکی شریناهی (بەقلاوە، زەلابی، کونافە........هتد) ل سەر عەرەبانان، سەرجادده‌یان، شووسته‌یان و جهێن ڤەکری بهێنە فرۆشتن .
3. نابیت شریناهی بهێنە دانان ژ دەرڤەی وان جهێن لێ دهێتە فرۆشتن و دڤێت د نخافتی بن.
4. شریناهیێن کارگەهێن پارێزگەهێن دیتر وەک(بەقلاوە، زەلابی، کونافە، شەربەت و.......هتد) دڤێت ل دویف رێنمایێن ساخلەمیێ بن و مێژوویا دروستکرنێ ل سەر بن و لێبلێ کارگەهێ ژی لسەر هەبیت.

گوشت و بەرهەمێن گوشتی:

1. نابیت گوشت ژ دەرڤەی جامخانان و دەرڤەی تەزیکەران بهێتە دانان.
2. پشتی دەمژمێر (12)ی نیڤرۆ دڤێت گۆشت بهێتە هەلگرتن د تەزیکەران دا.
3. نابیت ئاژەل ژ دەرڤەی سەربرخانەیێن دەستویردای بهێنە سەرژێکرن.
4. دڤێت هەمی کەلەخێن ئاژەلی یێن سەرژێکری مۆرا ڤیتێرنەریێ ل سەر هەبیت و یا دیار و ئاشکرا بیت کو ئەو ئاژەلە ل دەمێ سەرژێکرنێ یێ ساخلەم بوو.

خوارن و خارنگەهـ:

1. جگارە کێشان قەدەغەیە ل هەمی جهێن خوارن لێ دهێتە پێشکێشکرن.
2. ئەو خوارنگەهێن د هەیڤا رەمەزانێ دا شریناهی و شەربەتان دفرۆششن دڤێت شریناهێن وان د قالکێن تایبەت دا بن و لێبلێ کارگەهێ یان جهێن چێکرنێ ل سەر بن و ل جەهەکێ گونجای و ساخلەمی بهێنە نیشاندان و نابیت ژ دەرڤەی جهێن خۆ بدانن و ئەگەر ئەڤ کارە کر دڤیت کارێ پێشکێشکرنا خوارنێ براوەستینن دا کو کار تێکەل نەبن.

تێبینی:

1. دڤێت هەمی جهێن گشتى پێگیریێ ب ڤان مەرج و رێنمایان بکەن و پاقژیا گشتی ب پارێزن و ئەو جهێن سەرپێچی هەبن دێ کەڤنە بن بارێ سزایێن یاسایی.
2. بەفرا کارگەهان بتنێ بو تەزاندنێ یە و بکێر ڤەخوارنێ ناهێت لەوما دڤێت بتنێ بۆ مەرەما تەزاندنێ بهێتە بکارئینان.
3. لیژنێن دویفچوونێ (لیژنا بلند یا پاراستنا ساخلەمیا گشتى ل دهۆکێ و ل قەزایێن سەر ب پارێزگەها دهۆکێ ڤە، لیژنێن دویفچوونا سەرپێچیا ل قائممقامیێن قەزا، تیمێن زێرەڤانی و چاڤدێریا سەلامەتیا خوراکی، تیمێن رێڤەبەریا ئاسایشا پارێزگەها دهۆکێ/ ئابۆری ب هەماهنگی ل گەل تیمێن ساخلەمیێ) دێ بەردەوام دویفچوونا ڤان رێنما کەن ل ناڤ بازاری و کولانێن باژێری بۆ پاراستنا ساخلەمیا گشتی و جهێن سەرپێچ کار دێ هێنە سزادان ل دویف یاسا ساخلەمیا گشتى.

رێنمایێن تایبەت ب ئامادەکرنا شەربەتا مێویژان

1. ئەو جهێن شەربەت لێ دهێتە چێکرن و ئامادەکرن دڤێت دەستویریا ساخلەمیێ هەبیت .
2. جهەکێ گونجایی بۆ هەلگرتنا مێویژێن هشکری هەبیت دویر ژ شه‌هێ، تەراتیێ و پیسبوونێ.
3. شویشتنا مێویژان ب ئاڤەکا پاقژ و ساخلەم و بهێنە تافیلکرن.
4. نماندنا مێویژان ب ئاڤەکا ساخلەم و ل جهەکێ گونجای بیت و نە ژ دەرڤە بیت.
5. هێرانا مێویژان ب ئامیرێن پاقژ و ئۆتۆماتیکی بیت.
6. بکارئینانا ئاڤا داگرتی یان ئاڤا فیلتەرکری بۆ پارزنینێ.
7. بتنێ بکارئینانا تاما پینگی و نابیت پینگێ هشک کری بهێتە بکارئینان.
8. ئەو ئامانا دهێتە بکارئینان بۆ شەربەتێ دڤێت بتنێ بۆ ئێک جار بهێنە بکارئینان .
9. شەربەت بتنێ بۆ رۆژانە بهێتە ئامادەکرن و نەمینیت بۆ رۆژا دی.
10. جهێن شەربەتێ ب کۆم دفرۆشن پێدڤیە پسوولا فرۆشتنێ ل گەل بیت و ژێدەر یێ ئاشکرا و دیاربیت.
11. ڤەگوهاستنا شەربەتی ژ جهەکێ بۆ جهەکێ دی دڤێت ب شێوەکێ ساخلەم بیت.
12. بەردەوام دێ نموونە هێنە وەرگرتن بۆ پشکنینان و ل دویف یاسا ساخلەمیێ بریار دێ ل سەر هێتە دان وەک ل خوارێ دیار:

مادێ 10-أ/ دەقێ وێ (فی حالة فشل النموذج للمرة الاولى یوقف الجهة المختصة عن العمل لمدة لا تقل عن (7)سبعة أیام لاجراء و اعمال التنظیف و التعقیم و تلافی النواقص ثم تعاد الفحص بطریقة عشوائیة و فی حال فشل النموذج للمرة الثانیة  تتخذ الاجراءات القانونیة و فی حالة فشل النموذج فی محل معین لاکثر من مرتین یحال صاحب العلاقة الى المحکمة وفق المادة 99 من قانون الصحة العامة 89 لسنة 1981 و تذکر مسببات الاحالة مشفعة بالنتائج المختبریة).

رێڤەبەریا کاروبارێن خۆپاراستنا ساخلەمیێ/ دهۆک

پشکا چاڤدێری و سەلامەتیا خۆراکی