بایدن بۆ ئیرانێ:خۆ بۆ مه بهرههڤ بكهن دێ گورزێن دژوار وهشینن
گاڤ
سهرۆكی ئهمریكا جۆ بایدنی هوشدارى دا ئیرانێ و راگههاند، وهلاتێ وى بۆ پاراستنا هێزێن خۆ ل رۆژئاڤایێ كوردستانێ و سووریێ دێ گورزێن دژوار وهشینیت، د دهمهكى دا بۆمبهبارانكرنا ههردو ئالییان دژى هێزێن ههڤدو بهردهوامه.
دوهى پنتاگۆنێ ل تۆلا هێرشهكا پێر یا فرۆكهیهكا بێفرۆكهڤان یا ئیرانى بۆ سهر بنگهههكێ هیزێن ئهمریكا ل نێزیك باژیرێ حهسهكێ یێ رۆژئاڤایێ كوردستانێ، سێ پیگههێن گرۆپهكا چهكدار یا سهر ب ئیرانێ ڤه كرنه ئارمانج و ب كێمى 14 كهس كوشتن. پشتى ڤێ هێرشێ ب 10 موشهكان هێزێن ههڤپهیمانیا نێڤدهولهتى رۆژئاڤایێ كوردستانێ بوونه ئارمانج.
جۆ بایدنى ل باژێڕێ ئۆتاوا ل كهنهدا گۆت "ئهمریكا ناخوازیت ل گهل ئیرانێ بچیته د شهڕى دا، لێ بلا خۆ بۆ مه بهرههڤ بكهن، ژبهركو دی گورزێن بهێز وهشینین داكو هێزێن خۆ بپارێزین".
بایدنی گۆت ژى: ئهمریكا ل گهل ههڤپهیمانێن خۆ دێ لسهر بزاڤێن خۆ د بهرهنگاربوونا گهفێن تیرۆرستى دا ل دهڤهرێ بەردەوام بیت.