گاڤ

داخوازا بلندكرنا مووچه‌یێن خانه‌نشینان ل ئیراقێ ژ بۆ ئێك ملیۆن دیناران ژ به‌ر تێرنه‌كرنا پێدڤیاتیێن سه‌ره‌كى هاته‌ كرن.

فازل غه‌راوى سه‌رۆكێ سه‌نته‌رێ ستراتیژى یێ مافێن مرۆڤى ل ئیراقێ ئه‌ڤرۆ شه‌مبیێ د به‌یانه‌كێ دا دیاركر؛ ته‌خا خانه‌نشینان ژ به‌ر مووچه‌ و ده‌رماله‌یێن وان یێن كێم، نه‌شێن پێدڤیاتیێن سه‌ره‌كى یێن ژیانى دابین بكه‌ن.

خۆیا ژى كر؛ گرانبوونا بهایێن كرێیان، كه‌ره‌سته‌یێن خۆراكى، ده‌رمانان و پێدڤیاتیێن سه‌ره‌كى یێن دى بووینه‌ ئاریشه‌ بۆ خانه‌نشینان كو نه‌شێن 10% ژ وان ئه‌دا بكه‌ن.

ناڤهاتى داخواز ژ حكومه‌تێ و په‌رله‌مانى كر كو یاسایا خانه‌نشینیێ هه‌موار بكه‌ت و كێمترین مووچه‌یێ خانه‌نشینیێ ببیته‌ ئێك ملیۆن دینار و پارچه‌یێن عه‌ردى، قه‌ڕێن بێ قازانج و پاداشتێن ب له‌ز بۆ تێركرنا پێدڤیاتیێن خانه‌نشینان ب وان بهێنه‌ دان.