ده‌رمانه‌ك بۆ رێگریێ ل قه‌له‌ویێ دێ هێته به‌رده‌ستكرن
بەلاڤ بکە
گاڤ
ده‌رمانه‌كێ نوى بۆ رێگریێ ل زێده‌بوونا كێشا له‌شى ژ لایێ لێكۆله‌رێن ئه‌مریكى ڤه هاتیه دروستكرن و د تاقیكرنان دا ئه‌نجامێن باش بده‌ستڤه‌ئینایه.
كۆڤارا Cell Reports ئه‌نجامێن لێكۆلینه‌كا لێكۆله‌رێن زانكۆیێن تكساس، پێنسلڤانیا و كۆرنێل ل ئه‌مریكا به‌لاڤكرینه كو تیما لێكۆله‌ران تاقیكرن ل سه‌ر چه‌وانیا كارتێكرنا مه‌گنیسیۆمێ ل سه‌ر مێتابۆلیزمێ كرینه.
مه‌گنیسیۆمێ رۆله‌كێ سه‌ره‌كى د ساخله‌میا باش دا هه‌یه، وه‌كى رێكخستنا رێژه‌یا شه‌كرێ د خوینێ دا، هه‌روه‌سا كارتێكرنه‌كا باش ل سه‌ر فشارا خوینێ و گه‌شه‌كرنا هه‌ستیان هه‌یه، لێ رێژه‌یێن مه‌زن ژ مه‌گنیسیۆمێ، كریارا به‌رهه‌مئینانا وزه‌یێ د مایتوكۆندریایێ دا، وێستگه‌ها گوهۆڕینا خوارنێ بۆ وزه‌یێ، هێواش دكه‌ت.
"ب ژێبرنا MRS2، ئه‌و جینێ مه‌گنیسیۆمێ ژ بۆ مایتوكۆندریایێ ڤه‌دگوهێزیت، كڕیارا مێتابۆلیزما شه‌كر و خوینێ ل وێستگه‌هێن به‌رهه‌مئینانا وزه‌یێ د له‌شى دا باشتر لێهات و ده‌مێ ل سه‌ر مشكان هاتیه تاقیكرن، كێشا له‌شێ وان كێم بوو و ساخله‌متر دیار بوون"، ل گۆره‌ى كۆڤارێ.
لێكۆله‌ران ناڤێ CPACC دانايه سه‌ر ده‌رمانێ بۆ رێگریێ ل زێده‌بوونا كێشا له‌شى هاتیه به‌رهه‌مئینان.
ئه‌و ده‌رمانه رێژه‌یا مه‌گنیسۆما بۆ وێستگه‌هێن به‌رهه‌مئینانا وزه‌یێ د له‌شى دا دچیت، سنووردار دكه‌ت.
ئه‌و ده‌رمانه مه‌ترسیا تووشبوونێ ب نه‌خۆشیێن دلى و ده‌مارێن خوینێ، جه‌لته‌یێن دلى و مه‌ژى و په‌نجه‌شێرا مێلاكێ ژى كێم دكه‌ت.
