جیھانا ژنێ و جیھانا زەلامى!
بەلاڤ بکە
هۆگر نێروەیی
جیھانا ژنێ ب ته‌مامی ژ جیھانا زەلامی جودایه، لێ جیھانێن ھەردوکان ته‌مامکەرێن ھەڤدونە، نابیت زەلام مینا جیھانا خۆ بنێریتە جیھانا ژنێ، بەلکو دڤێت شارەزاییەکا ته‌مام ل دۆر جیھانا ژنێ ھەبیت پاشى ده‌رباز ببیت، ھەڤدەم ژن ژی دڤێت بزانیت ئەو جیھانا زەلامی چ تشتی دخوازیت، پاشى دەرگەھی بقوتیت. ئه‌گەر نە، ھەردو رەگەز مینا جیھانا خۆ ل جیھانا ھەڤدو بنێرن و خۆ نەگوھۆڕن، دێ خۆ د جیھانا ھەڤدو دا بەرزەکەن و چ جاران ھەست ب ھەبوونا خۆ ناکەن. زەلام ژ بۆ ھندێ كو د جیھانا ژنێ دا ژیانێ بکەت، دڤێت بزانیت سایکۆلۆژیا وێ جیھانێ چاوا ھاتیە نەخشاندن، ھەڤدەم ژن ژی دڤێت سایکۆلۆژیا جیھانا زەلامی ب ته‌مامی بزانیت ژ بۆ ھندێ دا تووشی چ تاریاتیان نەبیت.
سایکۆلۆژیا ھەردو جیھانان ب ته‌مامی جودایه، ئه‌گەر تێنەگەھی، مینا چیایەکى یه ل سەر پشتا تە لێ ئه‌گەر تێبگەھی، ب ساناھی ھەمی گرفت و بەربەستان ده‌رباز دكه‌ى. شەنگستێ جیھانا ژنێ گرنگیپێدانە، شەنگستێ جیھانا زەلامی باوەریپێبوونە. جیھانا ژنێ چ جاران تشتەکێ ژ زەلامی ناخوازیت کو ژ دەسھەلاتا وی زێدەتر بیت بەلکو ھەردەم وی تشتی ژێ دخوازیت کو ھەیە لێ دەرنابڕیت. جیھانا زەلامی ژی ب تنێ پێتڤیه ئارام و بێهنفرەھ بیت تا كو ل سه‌ر پێسترکان بسەربکەڤی، ئه‌گەر ئارام نەبی، دێ د پێسترکان دا کەڤی و نارابی.
جیھانا ژنێ دەمێ تۆرە دبیت، دخوازیت باخڤیت و ھند باخڤیت ھەتا ھەر تشتێ د دلی دایە چەند جاران دوبارە بکەت، ل وی دەمی، جیھانا ژنێ ب تنێ ژ زەلامی دڤێت گوھدارەکێ باش بیت و بێی کو چاڤەرێ بیت ئاریشا وێ چارەسەر بکەت، دەمێ گوھدانێ ژی، ب شێوەیەکی بیت کو ژ دل و حەزکرن گوھداریێ دکەت بێی بێزار بیت و چاڤان ل چاڤێن ژنێ ڤەنەکەت، لێ جیھانا زەلامی دەما تۆرە دبیت، حەز ژ بێدەنگیێ و تنێبوونێ دکەت، چاڤەرێ دکەت ژن وی ب تنێ بھێلیت و نەھێتە د جیھانا وی دا و دگەل باخڤیت، بەلکو ھند چاڤەرێ بیت ھەتا زەلام ب خۆ ئاریشه‌یا خوە د بێدەنگیێ و تنێبوونێ دا چارەسەر دکەت، پاشى دەرگەھێ جیھانا خۆ ب دلخوازی بۆ ژنێ ڤەکەت.
جیھانا ژنێ ھەردەم پێدڤی ب گرنگیپێدانێ و وەسفکرنی و پاداشتکرنێ یە، ژنێ پاداشتێ مەزن ژ زەلامی نەڤێت بەلکو ھندەک پاداشتێن بچویک لێ ب گرنگیپێدان بن، مینا ھەر دەمێ خوارنێ دخۆی، ژ به‌ر ئامادەکرنا وێ خوارنێ دەستخۆشیێ لێبکەی، ئه‌گەر ھندەک جاران خوارنا وێ وەک پێدڤی ژی نەبیت، نابیت لومەی لێبکەی چونکە جیھانا ژنێ، لومەکرنێ ب شەرم و شکاندنا خۆ دزانیت، به‌لكو پێدڤیه ھەردەم ڤێ دوبارە بکەی؛ تو ھەردەم یا جوانی لێ ئەڤرۆ جوانتر دھێیە بەر چاڤێن من، ژنێ پێدڤی ب ھندێ نینە تو ھەردەم ئەلماسەکێ یان تشتەکێ بوھا بۆ بینی بەلکو دەمێ تو تشتەکێ بچویک ژی مینا گولەکێ یان تشتەکێ دی بۆ بینی، ھەر وەکى تە بۆ مەزنترین ئەلماس و زێر ئینای چونکە ژن دێ ھەستپێکەت ھەردەم ل بیرا زەلامی یە و یا بۆ گرنگە.
جیھانا زەلامی ھەردەم پێدڤی ب باوەریپێبوونێ و بێهنفرەھیێ ھەیە، نابیت چو جاران ژن وی شاشیێ بکەت کو دەمێ زەلام دکەڤیتە د ئاریشەکێ دا، زەلامەکێ دى بینیتە د جیھانا زەلامێ خۆ دا، مینا ل فلان زەلامی بپرسە ئەو دشێت ھاریکاریا تە بکەت، ئەڤە مەزنترین تاوانە د جیھانا زەلامی دا، چونکە زەلام وەسا ھزر دکەت ئەو کەسەکە نەشێت کێشه‌یان چارەسەر بکەت، ھەست ب شکەستنا خۆ و شەرمێ دکەت. کو وەک پێدڤی نینە، سرۆشتێ جیھانا زەلامی وەسایە ھەردەم دخوازیت ئەو ب خۆ ئاریشه‌یان چارەسەر بکەت، ب تنێ پێدڤی ب ھندێ یە باوەریا ته‌مام بدەیێ، وه‌كى گۆتنێن: بەلێ تو دشێی ڤی کاری بکەی، شیانێن تە گەلەک ژ ڤێ ئاریشێ مەزنترن، ھەردەم ب شیانێن تە سەرسامین و ھەر تشتێ تە دەستێ خۆ ھاڤێتیێ تە چارەسەرکریە.
یا ژ ھەمیان گرنگتر، د دەمێ تۆرەبوونێ دا، نابیت ل ھەڤدو ب گۆمان بن، گه‌له‌ك جاران ژن ھند تۆرە دبیت، نزانیت چه‌وا تۆرەبوونا خۆ دەربێخیت، ڤێ گۆتنێ دەردئێخیت؛ من چو جاران خۆشی ل گەل تە نەبوویە، ژیانا من ل گه‌ل ته ھەمی نەخۆشی بوویە یان تە ھەمی ژیانا من نەخۆش و رەشکریە، نابیت د دەمێ تۆرەبوونێ دا ڤان گۆتنان وەک خۆ ل سەر ژنێ حساب بکەن چونکە ژنێ چ جاران مەرەم پێ ئەو ئاخفتن نینن بەلکو تنێ د وی دەمی دا ھندی ھندا بێزار و تۆرەیە ڤان ئاخفتنان دبێژیت بێی کو ھەست پێبکەت چ گۆتن ژ دەڤی دەردکەڤن. زەلام ژی دەمێ تۆرە دبیت، ھەر پێدڤی ھندێ یە وی بھێلیە ب تنێ بێی بەرسڤا گۆتنێن وی بدەت چونکە ھەتا زێدەتر ل گەل باخڤی و بەرسڤا وی بدەی، زێده‌تر تۆرە دبیت لەوما پێدڤیه بھێلیە ب تنێ و بشێی نەئاخڤی ھەتا تۆرەبوونا وی دھێتە خوارێ.
گرنگە بزانین جیھانا ژنێ و زەلامی د دەمێ تۆرەبوونێ دا دەمکی یە و نە ب سرۆشتێ جیھانا وانە، ئەو گۆتن ب تنێ د تۆرەبوونێ دا دھێن، ئه‌گەر نە، د دەمێن دی دا جھێ خۆ د جیھانا وان دا ناکەن. گەر ژن و زەلام د ھەڤدو بگەھن، ژ جیھانا ھەردویان شرینتر نینه لێ گەر د ھەڤدو نەگەھن، ژ جیھانا وان تەعلتر نینه، وه‌كى ژەھرا ماری یە.
