گاڤ

پۆلیسێن هەولێرێ گرتنا باندەکا دزیکەران راگەهاند و دیار کر: وێ باندێ ژن بۆ دزینا پارە و کەلوپەلێن شوفێران بکار دئینان.

هۆگر عەزیز، رێڤەبەرێ راگەهاندنا پۆلیسێن هەولێرێ ئەڤرۆ د کۆنگرەیەکێ رۆژنامەڤانی دا راگەهاند: شوفێرەکی سکالایەک تۆمار کربوو کو 80 هزار دۆلارێن وی ژ ترومبێلا وی هاتینە دزین، پشتی پۆلیسان دویڤچوون کری، دیار بوو دو ژن و زەلامەک ب وێ دزیێ رابووینە.

ژێدەری دیار ژی کر: پشتی ڤەکۆلینان دەستپێ کری، دیار بوویە باندەکا مەزن ب رەنگەکێ رێکخستی وی کاری دکەت. ئەو باند پێک دهات ژ چار ژن و سێ کچێن ژیێ وان د ناڤبەرا 13 بۆ 17 سالان دا.

پۆلیسان دایە زانین ژی: ئەو ژن ل سەر رێیا سەرەکی یا د ناڤبەرا هەولێر بۆ مووسلێ دا رادوەستیان، ل گەل شوفێرێن ترومبێلێن بارهەلگر سوار دبوون و هەر چ کەلوپەل و پارەیێ ب دەست وان کەفتبا، ژ شوفێران ددزی.

پۆلیسێن هەولێرێ دەربارەی ڤەگەڕاندنا پارەیێ هاتیە دزین، خۆیا کر: ل گەل گرتنا باندەکێ ژ وان دەست ب سەر 80 هزار دۆلار و 4 ملیۆن دیناران دا هاتیە گرتن و ل گەل باندا دی دەست ب سەر 5 ملیۆن دیناران دا هاتیە گرتن.