سه‌رۆك نێچیرڤان بارزانى رۆژا هه‌لبژارتنێن په‌ڕله‌مانێ كوردستانێ دیاركر

بەلاڤ بکە

گاڤ

سه‌رۆكێ هه‌رێما كوردستانێ رۆژا 18-11-2023ێ وه‌ك رۆژا هه‌لبژارتنان دیاركر و داخواز ژ ئالیان كر دوماهیێ ب ناكۆكیان بینن و یاسا و مافێن خه‌لكى ل سه‌رێ لیستێ بن.

دلشاد شه‌هاب، په‌یڤدارێ سه‌رۆكاتیا هه‌رێما كوردستانێ راگه‌هاند، ژسالا بوری و تا نها سه‌رۆكاتیا هه‌رێمێ كارى بۆ دیاركرنا رۆژا هه‌لبژارتنان دكه‌ت و ئه‌ڤرۆ سه‌رۆك نێچیرڤان بارزانى ب فه‌رمانه‌كا هه‌رێمى 18-11-2023ێ وه‌ك رۆژا هه‌لبژارتنێن په‌ڕله‌مانێ كوردستانێ دیاركر.

داخواز ژى ژ په‌ڕله‌مانێ كوردستانێ كر، هه‌ر زوو كارى بۆ كاراكرنا كۆمسیۆنا هه‌لبژارتنان بكه‌ن و ئه‌و ناكۆكیێن د ناڤبه‌را ئالیێن سیاسى ژى دا ل دۆر قانوونا هه‌لبژارتنان بهێنه‌ چاره‌كرن.

په‌یڤدارێ سه‌رۆكاتیا هه‌رێمێ داخواز ژى ژ ئالیێن سیاسى كر مافێن یاسایى و ده‌ستوورى یێن خه‌لكێ كوردستانێ بێخنه‌ به‌رى هه‌موو كاره‌كى.

ل دوماهیا كۆنگره‌یێ خۆ یێ رۆژنامه‌ڤانى دلشاد شه‌هاب داخواز ژ نه‌ته‌وه‌یێن ئێكگرتى ژى كر بۆ سه‌رخستنا پرۆسێ هاریكاریا هه‌رێما كوردستانێ بكه‌ن.

 

ژ ئالیه‌كێ دى ڤه‌ گۆت: په‌یوه‌ندیێن هه‌رێم و ئه‌مریكا نه‌ گرێدای راپۆرته‌كێنه، په‌یوه‌ندى گه‌له‌ك به‌رفره‌هـ ترن و هه‌ڤپشكیه‌كا مه‌زن هه‌یه‌، چ مه‌ترسى ژى د په‌یوه‌ندیێن دبلۆماسى دا نینه‌.

پرسا په‌ترۆلێ كارتێكرنێ ل په‌یوه‌ندیێنن هه‌رێما كوردستانی و توركیا ناكه‌ت و په‌سه‌ندكرنا قانوونا بودجێ و بجهكرنا پشكا هه‌رێمێ د بودجه‌یى دا نه‌خشه‌رێ یه‌ بۆ قانوونا نه‌فت و گازێ.

ده‌رباره‌یى پرسا پێكهاتان، په‌یامنێرێ گاڤ به‌شدار حسێن ژ په‌یڤدارێ سه‌رۆكاتیا هه‌رێمێ پرسى دێ چاوا سه‌ره‌ده‌ریى ل گه‌ل وان هێته‌كرن؟

دلشاد شه‌هاب، په‌یڤدارێ سه‌رۆكاتیا هه‌رێما كوردستانێ گۆت: هه‌ر ده‌ما به‌حس ل قانوونا هه‌لبژارتنان هاتیه‌ كرن، سه‌رۆكاتیا هه‌رێمێ دوپاتى ل پاراستنا مافێن پێكهاتان كریه‌ و هه‌موو ئالیه‌ك كۆكن ل سه‌ر دانا وان مافان و سه‌رۆكێ هه‌رێما كوردستانێ خۆ ب زامنكارێ پێكهاتان دزانیت.

تا نوكه‌ مه‌ ئاگه‌هـ ژ چ ده‌نگۆیان نینه‌ كو هنارتنا په‌ترۆلێ هاتبیته‌ راگرتن، رێككه‌فتن د ناڤبه‌را هه‌رێما كوردستانێ و توركیا دا هه‌یه‌ و ئه‌گه‌ر راگرتنه‌كا ده‌مكى ژى هه‌بیت، لێ هنارتنا په‌ترۆلێ دێ به‌رده‌وام بیت.

ل دۆر قه‌واره‌یێ هه‌رێمێ ژى گۆت: قه‌واره‌یێ هه‌رێما كوردستانێ قه‌واره‌یه‌كێ ده‌ستوورى یه‌ و پێگه‌هه‌كێ دبلۆماسى و سیاسى ل سه‌ر ئاستێ نێڤده‌وله‌تى هه‌یه‌ و ئه‌ندامێن جڤاتێن ئاسایشێ نوونه‌رێن فه‌رمى ل هه‌رێما كوردستانێ هه‌نه‌ و ئه‌ڤه‌ ژى دانپێدانێن ب فه‌رمى نه‌ و گه‌لێ كورد گه‌له‌كێ خۆراگره‌ و ب چ گۆتنان پێگه‌هێ وێ ناهه‌ژیت و نالڤیت.

هەروەسا دیار ژی کر، هه‌لبژارتنێن جڤاتێن پارێزگه‌هێن ئیراقێ ل هه‌رێما كوردستانێ ناهێنه‌كرن

 

زێدەتر دەربارەی