500 ملیار دینار بۆ جۆتیاران هاتنه ته‌رخانكرن
بەلاڤ بکە
گاڤ
جڤاتا وه‌زیرێن ئیراقێ رازیبوون ل سه‌ر ته‌رخانكرنا 500 ملیار دیناران بۆ جۆتیاران ژ به‌رى ده‌ستپێكرنا وه‌رزێ بازاركرنا گه‌نمى كر.
وه‌زاره‌تا بازرگانیا ئیراقێ ئه‌ڤرۆ ئێكشه‌مبیێ راگه‌هاند؛ محه‌مه‌د شیاع سوودانى سه‌رۆكوه‌زیرێ ئیراقێ رازیبوون ل سه‌ر ته‌رخانكرنا 500 ملیار دیناران وه‌ك شایسته‌یێن جۆتیاران به‌رى ده‌ستپێكرنا وه‌رزێ بازاركرنێ یێ ئه‌ڤ ساله دا.
وه‌زاره‌تێ دیار ژى كر كو ئه‌ڤ چه‌نده ژ بۆ پشتراستكرنا جۆتیارایه ژ گه‌هشتنا شایسته‌یێن وان بۆ وان ب به‌رده‌وامى.
ئاماژه دایه وێ چه‌ندێ ژى؛ ئه‌ڤ چه‌نده دێ بیته پالده‌ر بۆ جۆتیاران بۆ راده‌ستكرنا گه‌نمێ خۆ بۆ عومبارگه‌هێن وه‌زاره‌تا بازرگانى.
ئاشكرا ژى كر؛ جڤاتا وه‌زیرێن ئیراقێ بڕیارا گرتنا سنووران ل هه‌مبه‌ر هاتنه‌ناڤا بارهه‌لگرێن گه‌نمى ژ ده‌رڤه‌ى ئیراقێ بۆ دناڤ ئیراقێ دا دا.
وه‌زاره‌تێ ل رۆژا 23ى ڤێ هه‌یڤێ دیاركربوو كو بهایێ كڕینا هه‌ر ته‌نه‌كێ گه‌نمى ژ جۆتیاران د ڤى وه‌رزى دا 850 هزار دینارن.
خۆیا ژى كربوو كو شایسته‌یێن جۆتیاران د ماوه‌یێ نه‌پتر ژ دو حه‌فتیان دا ژ راده‌ستكرنا گه‌نمى، دێ ب وان هێنه دان.
