گاڤ

بەرپرسێ فەرمانگەها پەیوەندیێن دەرڤە یا حکومەتا هەرێما کوردستانێ ئەڤرۆ ل گەل کۆنسلێ گشتیێ ئەمریکا دوماهی راپۆرتا وەزارەتا دەرڤە یا ئەمریکا بەحس کر.

سەفین دزەیی، بەرپرسێ فەرمانگەها پەیوەندیێن دەرڤە یا حکومەتا هەرێما کوردستانێ د تویتەکێ دا راگەهاند؛  ئەڤرۆ ل گەل ئێرڤین هیکس، کۆنسلێ گشتیێ ئەمریکا دەربارەی دوماهی پێشهاتێن سیاسی و راپۆرتا ڤێ دوماهیێ یا وەزارەتا دەرڤە یا ئەمریکا، هەروەسا بوارێن هەماهەنگی و هاریکاریا هەڤپشک بەحس کر.

د کۆمبوونێ دا بەیان سامی عەبدولرەحمان، نوینەرا حکومەتا هەرێما کوردستانێ ل ئەمریکا بەرهەڤبوو، کۆنسلێ گشتیێ ئەمریکا دوپاتی ل بەردەوامبوون و بهێزکرنا پەیوەندیێن دوقولی د بوارێن سیاسی، ئابۆری، ئەمنی و بازرگانی کر.

ل دوماهیا کۆمبوونێ هەردو ئالیان بەحسێ پەیوەندیێن د ناڤبەرا هەولێر و بەغدایێ کر و دوماهی پێشهاتێن هەرێما کوردستان و ئیراقێ ژی گۆتوبێژ کرن.