وەزارەتا دەرڤە یا ئەمریکا: ئەمریکا داخواز ژ ئیراق و تورکیا کریە بەردەوامیێ ب هنارتنا پەترۆلێ بدەن

بەلاڤ بکە

 

 

گاڤ

جێگرێ پەیڤدارێ وەزارەتا دەرڤە یا ئەمریکا دەربارەی راگرتنا هنارتنا پەترۆلا هەرێما کوردستانێ راگەهاند؛ واشنتۆنێ داخواز ژ ئیراق و تورکیا کریە بەردەوامیێ ب هنارتنا پەترۆلی بدەن ب رێکا بوڕیا د ناڤبەرا ئیراق و تورکیا دا.

ڤێدانت پاتێل د کۆنگرەکەکێ رۆژنامەڤانی دا بەرسڤا پرسیارەکا دەربارەی رەوشا هنارتنا پەترۆلا هەرێما کوردستانێ دا و گۆت: راگرتنا هنارتنا پەترۆلێ مفایی ناگەهینیتە چ ئالیان، وان داخواز ژ حکومەتێن ئیراق و تورکیا کریە بەردەوامیێ ب دەنە هنارتنا پەترۆلێ.

هەروەسا گۆت: بەرپرسێن هەرێما کوردستانێ ل گەل حکومەتا بەغدا د گۆتوبێژان دانە بۆ دیتنا چارەیەکێ، ئیراق و ئەمریکا ژی ل واشنتۆنێ کۆمسیۆنەک پێکئینایە و بەرپرسێن ئەمریکا داخوازێ ژ بەرپرسێن ئیراق و هەرێما کوردستانێ دکەن کێشەیێن بۆدجە و هایدرۆکاربۆنێ چارە بکەن داکو مفا ب گەهیتە هەموو ئیراقیان.

دەربارەی راپۆرتا فۆرن پۆلیسی ژی کو کۆنسلێ گشتیێ ئەمریکا ل هەولێرێ ل سەر سۆشیال میدیایێ بەلاڤکربوو گۆت: ئیراق و هەرێما کوردستانێ هەڤپەیمانێن ستراتیژی یێن ئەمریکا نە، لێ وی ئەو پۆستێ کۆنسلێ گشتیێ ئەمریکا نەدیتیە.

پێشتر کۆنسلێ گشتیێ ئەمریکا راپۆرتەکا رۆژنامەیا فۆرن پۆلیسی یا دەربارەی هەرێما کوردستانێ ل سەر مالپەرێ خۆ یێ لینکدئین بەلاڤ کربوو، لێ ئەڤرۆ ئەو پۆستە ژێبریە.