گاڤ

دهێته‌ چاڤه‌رێكرن كۆمپانیا ئه‌پل د كۆنفرانسێ پێشڤه‌به‌ران دا ل هه‌یڤا خزیرانێ یا بهێت به‌رهه‌مێ جودا و نایاب رابگه‌هینیت.

كۆمپانیا ئه‌پل ژ به‌رى نوكه‌ راگه‌هاند بوو كو ئه‌و دێ به‌رهه‌مه‌كێ مه‌زن د هه‌یڤا خزیرانا ئه‌ڤ ساله‌ دا راگه‌هینیت و ژماره‌یه‌كا پێشبینیان ل دۆر جۆرێ وى به‌رهه‌مى به‌لاڤبووینه‌.

ژماره‌یه‌كا راپۆرتێن میدیایى بۆ هندێ دچن كو ئه‌و به‌رهه‌مه‌ دێ به‌رچاڤكا ژیوارێ تێكه‌لكرى بیت و هنده‌ك پێشبینى هه‌نه‌ كو دێ پێشڤه‌برنا هێدفۆنه‌كێ بیت.

بۆ ده‌مێ هه‌شت سالایه‌ كۆمپانیا ئه‌پل كار ل سه‌ر پێشڤه‌برنا به‌رچاڤكا ژیوارێ تێكه‌لكرى دكه‌ت.

ژیوارێ تێكه‌لكرى ته‌كنیكه‌كه‌ ژیوارێ ڤیرچوال VR ل گه‌ل ژیوارێ بهێزكه‌ر AR تێكه‌ل دكه‌ت.

مارك گۆرمان دزه‌پێكه‌رێ ته‌كنولوژى ئه‌ڤ تشته‌ پشتراستكر و گۆت "به‌رهه‌مه‌كێ نوى یێ ئه‌پل بۆ جارا ئێكێ دێ د خزیرانێ هێته‌ راگه‌هاندن".

كۆنفرانسێ سالانه‌ یێ ئه‌پل یێ پێشڤه‌به‌ران WWDC دێ ل 5 تا 9ى خزیرانێ برێڤه‌چێت.