پلانا ریال مه‌درید ل دۆر ئێمباپێ ئاشكرا بوو
بەلاڤ بکە
گاڤ
پلانا یانه‌یا ریال مه‌درید بۆ ئینانا كێلیان ئێمباپێ یاریكه‌رێ فره‌نسى بۆ دناڤ رێزێن خۆ دا ئاشكرا بوو.
ئێمباپێ ل سالا 2022 گڕێبه‌ستا خۆ ل گه‌ل پاریس سان جێرمان بۆ سێ سالان تا كو هاڤینا سالا 2025 ئیمزا كربوو، لێ وه‌رزێ سیێ ژ گرێبه‌ستێ ل دویڤ حه‌زا ئێمباپێ یه، ئانكۆ ل هاڤینا سالا 2024 ئه‌و دشێت رێزێن یانه‌یێ ب جهـ بهێلیت.
د كه‌ڤه‌رێ رۆژنامه‌یا ئاس یا ئسپانى ئه‌ڤرۆ ئه‌ینیێ دا هاتیه؛ كارگێریا ریال مه‌درید ل به‌ر نینه ل هاڤینا ئه‌ڤ ساله گۆتوبێژان ل گه‌ل پاریس سان جێرمان بۆ كڕینا ئێمباپێ ئه‌نجامبده‌ت.
ئاشكرا ژى كریه؛ ریال مه‌درید پلان دانایه كو ل هاڤینا سالا 2024 د هه‌ڤبه‌سته‌كا ڤه‌گوهاستنێ یا ئازاد دا و بێى به‌رانبه‌ر، ئێمباپێ بینیته دناڤ رێزێن خۆ دا.
یانه‌یا ئسپانى پتر ژ جاره‌كێ بزاڤێن كڕینا ئێمباپى كرینه، جارا ئێكێ ل سالا 2017 بوو، لێ ئێمباپێ ل وى ده‌مێ ژ رێزێن مۆناكۆ چووبوو دناڤ رێزێن پاریس سان جێرمان دا.
جارا دوێ ل هاڤینا سالا 2021 بوو، لێ یانه‌یا PSG ل سه‌ر ئۆفه‌را ریال مه‌درید رازی نه‌ببوو.
هه‌روه‌سا ریال مه‌درید بزاڤكربوون كو ل هاڤینا سالا بۆرى 2022 ب بێبه‌رانبه‌ر پشتى ب دویماهیك هاتنا گرێبه‌ستا ئێمباپێ ل گه‌ل یانه‌یا فره‌نسى وى بینیته دناڤ رێزێن خۆ دا، لێ وى یاریكه‌رى ل وى ده‌مى گرێبه‌سته‌كا نوى بۆ سێ سالان ل گه‌ل پاریس سان جێرمان ئیمزا كربوو.
