گاڤ

ل گۆره‌ى ئه‌نجامێن راپرسیێن 17 كۆمپانیێن راپرسیان ل هه‌یڤا بۆرى، سه‌رۆك كۆمارێ نها یێ تركیا و به‌ربژارێ هه‌ڤپه‌یمانیا جمهۆر د هه‌لبژارتنێن 14ى ڤێ هه‌یڤێدا سه‌رناكه‌ڤیت.

ئاژانسێن نوچه‌یێن تركیا دده‌نه‌ زانین، ژ سه‌رجه‌مێ 17 راپرسیان كو ژ لایێ كۆمپانیێن راپرسیان ڤه‌ هاتینه‌ كرن، به‌ربژارێ هه‌ڤپه‌یمانیا ملله‌ت كه‌مال كلچدار ئوغلۆ 2.6 خالان ل پێش به‌ربژارێ هه‌ڤپه‌یمانیا جمهۆر یا سه‌رۆك كۆمار ئه‌ردۆغانى یه،‌ ره‌وشا خراب یا ئابۆرى فاكته‌رێ سه‌ره‌كى یێ داكه‌فتنا ده‌نگێن ئه‌ردۆغانى یه‌.

ژلایێ خۆڤه‌ هه‌ڤسه‌رۆكێ پێشتر یێ پارتا دیمۆكراتیا گه‌لان سه‌لاحه‌دین ده‌میرتاش به‌رسڤا به‌رپرسێن پارتا داد و گه‌شه‌پێدان و ئه‌ندامێن وێ دا كو دبێژن ئه‌گه‌ر ئه‌ردۆغان سه‌رنه‌كه‌ڤیت دێ ره‌وشا ئابۆرى یا تركیا تێك چیت.

ده‌میرتاشى د تویته‌كى دا راگه‌هاند و گۆت" هنده‌ك كه‌س هه‌نه‌ دبێژن ئه‌گه‌ر ئه‌ردۆغان د هه‌لبژارتنان دا سه‌رنه‌كه‌ڤیت دێ هه‌مى تشت خرا بن".

ده‌میرتاشى دیاركر، د نها دا یۆرۆ ب 20 لیره‌یانه‌، كیلۆیه‌كا گۆشتى، ب 300 لیره‌یانه‌، كیلۆیا په‌نیرى ب 200 لیره‌یانه، 5 ملیۆن كه‌س بێكارن، كێمترین كرێ 8500 لیره‌یه‌، 50 هزار كه‌سان د ئه‌ردهه‌ژێ دا گیانێ خۆ ژ ده‌ستدا. بۆ خاترا خودێ ره‌وش دێ خرابتر چه‌وا بیت؟.