حكومهتا ههرێمێ: رویدانا فرۆكهخانهیا سلێمانیێ ژ ئهنجامێ بكارئینانا سازیێن حكومهتێ بۆ كارێن نهیاسایى یه
گاڤ
حكومهتا ههرێما كوردستانێ دیاركر كو رویدانا ئهڤرۆ ئهینیێ ل فرۆكهخانهیا سلێمانیێ ژ ئهنجامێ داگیركرنا سازیێن حكومهتێ و بكارئینانا وان بۆ كارێن نهیاسایى یه.
د بهیانهكا د. جۆتیار عادل پهیڤدارێ حكومهتا ههرێمێ كوردستانێ دا هاتیه؛ دلگرانیا خۆ ب پهلاماردانا فرۆكهخانهیا نێڤدهولهتى یا سلێمانی دهردبڕین، ئهڤ رهوشا ترسناك ژ ئهنجامێ داگیركرنا سازیێن حكومهتێ و بكارئینانا وان بۆ كارێن نهیاسایى رویدایه.
تێدا هاتیه ژى؛ رهفتارێن دهستههلاتا خۆسهپاندى یا حزبى ل سنوورێ سلێمانیێ كار گههانده وێ چهندێ كو ئاسمانێ توركیا ب روویێ فرۆكهخانهیا نێڤدهولهتى یا سلێمانیێ دا بهێته داخستن و پاشى فرۆكهخانه بهێته پهلاماردان، د ئهنجام دا وهلاتیێن مه ل وێ دهڤهرێ باجا شاشیێن وان ددهن.
دیار ژى كریه؛ پێدڤیه ئهڤ كارێن نهرهوا ب دویماهیك بهێن و دهستههلاتا حكومهتێ بڤهگهڕیتهڤه و حوكمرانیهكا ژ ههژى خهلكێ سلێمانیێ و د خزمهتا خهلكى و بهرژهوهندیێن وان دا بهێته جێگیركرن و دویماهیك ب وێ رهوشا ئالۆز يا دهڤهرێ بهێت و ژیانهكا شایشته بۆ خهلكێ وێ بهێته دابینكرن.
ئاسایشا فرۆكهخانهیا سلێمانیێ یا نێڤدهولهتى راگههاند بوو كو تهقینهك ئهڤرۆ ئهینیێ ل سیاجێ فرۆكهخانهیێ رویدایه و چ زیانێن گیانى و ماددى نهبوون.
رێڤهبهریا ئاسایشا فرۆكهخانهیا سلێمانیێ د بهیانهكێ دا راگههاند بوو كو تهقینهك ل ئێڤاریا ئهڤرۆ ل دهمژمێر 4:18 ل نزیك سیاجێ فرۆكهخانهیا نێڤدهولهتى یا سلێمانیێ رویدا و چ زیانێن گیانى و ماددى نهبوون و ببوو ئهگهرێ ئاگربهربوونێ.
دیار ژى كربوو كو تیمێن بهرگریا شارستانى یا فرۆكهخانهیێ ئاگر كونترۆلكرن و لێكۆلین ل دۆر رویدانێ دهستپێكرینه.
بهرگریا شارستانى یا سلێمانیێ ژ لایێ خۆڤه د بهیانهكێ دا دیاركر بوو كو ئهو چهندا ئهڤرۆ ل نزیك فرۆكهخانهیێ رویداى، سۆتنهكا بچویك بوو بۆ هندهك بهرمایكان و هاته كونترۆلكرن.
خۆیا ژى كربوو كو تیمێن وان ئهو ئاگره كونترۆلكرن.
ژمارهیهكا نووچهیان ل سهر سوشیال میدیایێ بهلاڤبیوون و تێدا بهحس ل بۆمبهبارانهكێ ب درۆنهكێ ل سهر فرۆكهخانهیا نێڤدهولهتى یا سلێمانیێ كربوون.