یونیسێف هوشداریهكێ ددهت
گاڤ
رێكخراوا یونیسێف یا تایبهت ب كاروبارێن زارۆكان ڤه ئهڤرۆ ئهینیێ هوشداریهك ژ رهوشا زارۆكان ل سوودانێ دا و دیاركر كو د ههر دهمژمێرهكێ دا 7 زارۆك دبنه قۆربانیێن شهڕى.
یونیسێف ئهڤرۆ ئهینیێ راگههاند؛ ژ بهر شهڕێ سێ حهفتیێن بۆرى ل سوودانێ، ئامارێن مهترسیدار یێن قۆربانیان ژ زارۆكان ههنه.
رێكخراوێ ب پشتبهستن ب هندهك راپۆرتان ئاشكرا ژى كر كو د ههر دهمژمێرهكێ دا 7 زارۆك دبنه قۆربانیێن شهڕى دناڤبهرا گیانژدهستدانێ و برینداربوونێ دا.
جێمس ئێلدهر پهیڤدارێ یونیسێف د ڤى وارى دا دبێژیت "ئهو تشتێ ئهم ژێ دترسیاین رویدا و رهوش ل سوودانێ ژ بۆ زارۆكان گهلهك مهترسیدار بوویه".
ناڤهاتى ئاماژه دا وێ چهندێ ژى كو ل گۆرهى راپۆرتێن ژ ههڤپشكێن جهێ باوهریێ گههشتینه رێكخراوێ، 190 زارۆكان ب تنێ د 11 رۆژێن دهستپێكێ یێن شهڕى دا گیانێ خۆ ژدهستداینه و 1700 زارۆكێن دى بریندار بووینه.
ئاماژه دا وێ چهندێ ژى كو ئهڤ ژمارهیه ب تنێ یا وان زارۆكایه یێن بۆ بنگههێن ساخلهمیێ هاتینه ڤهگوهاستن و زێده ژى كر "رهنگه رهوش د راستى دا گهلهك خرابتر بیت".
شهڕ و پهڤچوون ل سوودانێ ههر ژ 15ى ههیڤا نیسانێ یا بۆرى دناڤبهرا سوپایێ وى وهلاتى و هێزێن پشتهڤانیا ب لهز دا رویداینه و ب سهدان كهسان تێدا گیانێ خۆ ژدهستداینه و ب هزاران كهسێن دى بریندار بووینه.
ههردو لایهنێن شهڕكهر پتر ژ جارهكێ ل سهر ئاگربهستێن دهمكى رێككهفتینه لێ رێزگرتن ل چ ژ وان ب شێوهیهكێ تهمام نههاتیه گرتن و هێرشێن ئاسمانى و پهڤچوونێن چهكدار ئهڤرۆ ئهینیێ ل خهرتۆما پایتهخت بۆ رۆژا 21 ل دویڤ ئێك د بهردهوامن.