گاڤ

وه‌زاره‌تا دارایى و ئابۆرى یا حكومه‌تا هه‌رێما كوردستانێ رادگه‌هینیت، دبیت د دو رۆژێن بهێت دا 400 ملیار دینار ژ به‌غدا بۆ هه‌رێما كوردستانێ بهێنه‌ هنارتن.

گاڤ ژ وه‌زاره‌تا دارایى زانیه‌، هه‌ر ده‌ما 400 ملیار دینار ژ به‌غدایێ بۆ هه‌رێما كوردستانی هاتنه‌ ره‌وانه‌كرن، ئه‌و دێ لیستا مووچه‌یان به‌لاڤ كه‌ن و ئێكسه‌ر دێ ده‌ست ب به‌لاڤكرنا مووچه‌یان كه‌ن.

مه‌سعوود حه‌یده‌ر، بریكارێ وه‌زاره‌تا دارایى و ئابۆرى یا حكومه‌تا هه‌رێما كوردستانێ بۆ ده‌نگێ ئه‌مریكا دبێژیت: پێشبینى یه‌ د هه‌یاما دو رۆژێن بهێت دا 400 ملیار دینار ژ به‌غدا بۆ هه‌رێما كوردستانێ بهێنه‌ ره‌وانه‌كرن و ئه‌و پاره‌یه‌ بۆ دابینكرنا مووچه‌یێن فه‌رمانبه‌رێن هه‌رێما كوردستانێ یه‌.

هه‌روه‌سا ئاشكراكر، دڤێت چاره‌یه‌كا بنگه‌هین بابه‌تێ مووچه‌یى بۆ بهێته‌كرن و ئه‌ڤێ یه‌كێ ژى پێدڤى ب وێ هه‌یه‌ قانوونا نه‌فت و غازێ بهێته‌ دانان و هنده‌ك ژ قانوونان بهێنه‌ راستڤه‌كرن.

پێشتر حكومه‌تا هه‌رێما كوردستانێ ل 1 تا 5ى مه‌هێ مووچه‌ به‌لاڤ دكرن، لێ پشتى بریارا دادگه‌ها فره‌نسا یا راوه‌ستاندنا ره‌وانه‌كرنا په‌ترۆلا هه‌رێما كوردستانێ مووچه‌ گیرۆ بووینه‌.

حكومه‌تێن ئیراق و هه‌رێما كوردستانێ رێككه‌فتى نه‌ په‌ترۆلا هه‌رێما كوردستانێ ب ئیراقێ بهێته‌ راده‌ستكرن ب رێكا كۆمپانیا سۆمۆ ب كۆمپانیێن جیهانى بهێنه‌ فرۆشتن، ئیراقێ ژى ل همبه‌رى وێ بڕیار دایه‌ پشكا هه‌رێمێ د بودجه‌یا ئیراقێ دا ب ریژه‌یا زێده‌تر ژ 12%ێ ره‌وانه‌یى هه‌رێمێ بكه‌ت.

تا نوكه‌ پڕۆژه‌قانوونا بودجه‌یا ئیراقێ ل جڤاتا نوونه‌رانه‌ و دو جاران ده‌نگدان ل سه‌ر هاتیه‌ كرن و دهێته‌ چاڤه‌رێكرن ل ده‌مه‌كێ نیزیك ده‌نگ ل سه‌ر بهێته‌ دان.

ل گۆره‌یى زانیاریێن گاڤ به‌رى دو رۆژان خاله‌كا دى ل پڕۆژه‌ قانوونێ هاتینه‌ زێده‌كرن و د وێ خالێ دا هاتیه‌ دیاركرن بتنێ هه‌رێم دی وى پاره‌یى ژ به‌غدایێ وه‌رگریت یێ ژ داهاتێ په‌ترۆلێ دهێت، تا نوكه‌ ژى حكومه‌تا هه‌رێمێ ل همبه‌رى زێده‌كرنا ڤێ خالێ چ هه‌لوه‌سته‌ك نه‌بوویه‌.