روال ناڤگوندى

ئێدی تەخێن رەوشەنبیر، هونەرمەند، مەدیاکار...هتد، زێدەتر ژ تەخێن دی یێن جڤاکی و دەستهەلاتێ، مە بێ هیڤی دکەن !
پشتی جەنگێ جیهانی یێ دویێ، خەلکێ باشوورێ کوردستانێ چەند شۆڕەش ل دژی دەستهەلاتا ئیراقێ کرن و هەتا دویماهیکێ سەرهەلدان ژی رابووى و ئەم ئازاد بووین. ئێدی ئەم بووینە خۆدان هەرێمەکا سەربەخۆ و مە دەستهەلات ل خۆ کر..
-  ژ پێخەمەت چ؟
-  دا کو بشێین د وێ هەرێمێ دا ب کوردی بژین، بئاخڤین، سترانان بێژین، ب کوردی پەروەردێ وەربگرین و ب کوردی دەواتان بکەین.
ئێ کا مە د ڤان بیست-سیهـ سالێن دەستهه‌لاتێ دا، چ بۆ کریە، کو د دەمەکی دا ئەم دشیاین چەندێ بۆ بکەین؟
ئەز بەحسێ دهۆکێ بکەم: ژ بلی فلمەفەستیڤالێ (جهێ شانازیێ یە).. هێشتا ئەم گوهداریا وان سترانێن بەری ڤێ دەستهەلاتێ دکەین (سترانێن سالێن نۆتان).. کا ستران؟ رێزمانا کو لافیتە، بەنەرێن مارکێتان و.. هتد پێ دهێنە نڤیسین.. کا زمان؟ ل ڤێرێ هۆلێن سینەمایێ نینن.. کا فلم؟
چەند تیپێن شانۆ و موزیکێ هەنە و ئەندام و رێڤەبەرێن چەندان گەنجن؟ کا گەنج و هونەر؟ (ئەڤە ل دهۆکێ.. ل دەردۆران وێرانتر).
پشتی سالێن پێنجی و شێستان، دێ چەند هونەرمەند، رەوشەنبیرێن کورد بینین کو ل هەمبەر ئەو بوویەر و جینۆسایدێن ب سەرێ مللەتێ کورد دهاتن، خۆدان هەلویست بوونە: (محەمەد شێخو، جوان حاجۆ، یەلماز گۆنەی، ناسرێ رەزازی، ئەیاز و ئەردەوان...هتد).
ئەوێن چووینە رەحمەتێ ب گۆڕێ خۆ شاد ببن. لێ ئەوێن هەتا نوکە د ژیانێ دا و شیانێن هەلویستان هەین، ل هەمبەر ڤان کارەساتێن (مرۆڤی، جڤاکی، سرۆشتی، نەتەوەیی..) ل کویڤەنە؟ بۆچی د بەرزەنە؟ ما ئەو ژی نە خەلکێ ڤێ ئاخێ و بەرهەمێ ڤێ ژینگەهێ نە؟
ئەڤان بدە لایەکی..
تەلەڤزیۆن و تۆڕێن جڤاکی؟
هێشتا لەهەنگێن تەلەڤزیۆنێن مە نە سەرۆکێن ئەشیرەتانە؟
هێشتا لەهەنگێن تۆرێن جڤاکی نە خەبەربێژن؟
جڤاک؟
جڤاکا مە یا نوکە، بەرهەمێ ژینگەهـ و پەروەرده‌یا چەند سالێن بەری نوکەیە و هوین دزانن رەوشا پەروەردێ ل ڤێرێ یا د چ ئاست دا!
ژبەرکو کوردستان وەلاتێ مەیە و ئەم گەلەک باش قەدرێ هەبوونا ڤێ هەرێما سەربخۆ دزانین، جار جار ئەگەر ب نڤیسین ژی نەبیت، د روینشتن و شەڤبێریێن خۆ دا، ئەم رەخنەیا دەستهه‌لاتێ و وان تەخێن مە گۆتی، دکەین.
-  ژ پێخەمەت چ؟
 - دا کو بشێین د ڤێ هەرێمێ دا (جوانتر) ب کوردی بژین، بئاخڤین، سترانا بێژین، ب کوردی پەروەردێ وەربگرین و ب کوردی دەواتان بکەین.. هتد.
دەستهەلات؟
ب راستی پێدڤیە ئێدی زێدەتر گرانیێ ل سەر مژارا چاندی (زمان، کەلتۆر، هونەر..).. بدانیت، لێ ب هشمەندییەکا رێک-کوردی و نویتر!
-  بۆچی؟
-  دا نڤشێن نوى بشێن هێز، شیان و داهێنانێن خۆ، ل ڤێرێ بەرجەستە بکەن.. هەکە نڤشێن نوى نەشیان هێز، شیان و داهێنانێن خۆ، ل ڤێرێ بەرجەستە بکەن.. نڤشێن نوى نەشێن ل ڤێرێ، ب جوانی، ب کوردی بژین، بئاخڤن، سترانان بێژن، ب کوردی پەروەردەیێ وەربگرن و ب کوردی ده‌واتان بکەن.. هتد.. دیسان هەکو نڤشێن نوى نەشیان د ڤێ هەرێمێ دا (جوانتر) ب کوردی بژین، بئاخڤن، سترانان بێژن، ب کوردی پەروەردەیێ وەربگرن و ب کوردی ده‌واتان بکەن... هتد.
یان دێ گوهۆڕن، یان دێ چن!