گەنجێ کورد د ناڤبەرا سێگۆشا ئیخوانیەت و ئەردۆگان و سایندرۆما ستهۆکۆلمێ دا

بەلاڤ بکە

جاسم صبری

عاشقبوونا زالمان وەک چەمکەکێ دەروونی یان دیاردەکا سیاسی و دیبلۆماسی، دیاردا لایەنگریی و پشتەڤانیا زالمان هەر ژ سەردەمێن کەڤن تا نها دیاردەکا زیقە لێ لژێر بارێ هەرەشێ و بەرژەوەندیان، پشتی کو سالا (1970)  روویدانا بارمتەکرنا چەند کەسەکان ل ئێک ژ بانکێن باژێرێ ستهۆکولمێ، ئێدی ئەڤ چەمکە بەرفرەهتر لێ هات و ژ پشتەڤانیێ دەربازی عاشقبوونێ بوو، ڤەکۆلەرێن بوارێ دەروونی ئێدی کار لسەر ئەڤی چەمکی کرن و ب سەدان ڤەکۆلین دەربارەی ئەڤی چەمکی ئەنجامدان و گەهشت وێ باوەرێ ئێدی ئەڤ بابەتە گرێیەکا دەروونی یە و گرێدای بیروباوەرێن مرۆڤی یە، چەندان نموونە دڤی بابەتی دا ئینانە پێش بۆ نموونە دایک و باب چەندین جاران زاروکێن خوە دئێشینن و دچەوسینن لێ کاریکەریا ئەوێ ئێشانێ لسەر ڤیان و حژێکرنا زارۆکی بۆ دەیک و بابن نابت .

 

ئەڤ نەخوەشیا دەروونی وەک پیلانەکا ماکیافیلی ئێدی دەربازی کارێ سیاسی و دەسهەلاتێ دبت و گەلەک جاران حکومەتەکا زالم و دکتاتور وەلاتەکێ برێڤە دبت ب هەمی ئامرازێن هەلسەنگاندنێ دەستهەلاتەکا دز و زالم و نەدادپەروەرە، لێ خەلکێ لژێر  سیبەرا وێ دەستهەلاتێ پشتگیریێ لێ دکن لسەر هەمان زولم و زورداریا لێ دهێتە کرن و دەستا بۆ دقۆتن و ب بەژن و بالا سەرکردێن وێ دبێژن و ئامادەنە دەستبەرداری هەر بیروباوەر و مافەکێ خوە ببن ژ پێخەمەت پاراستنا وێ دەستهەلاتا خراب .

 

ئەردوگان و ئیخوانیەت و سایندرۆما ستوکولمێ .

 

ئەردوگان وەک سیاسیەکێ ئیسلامی (ئیخوانی) و نیمچە علمانی د ماوێ دەستهەلاتا خوەدا وەک ڕابەرەکێ پاراستنا ئاینێ ئیسلامێ ل روژهەلاتا ناڤەراست بگشتی هەولا بەرفرەهکرنا پەیوەندی و بالادەستیا خوە کر برێکا بیروباوەریێن خوە یێن ئیسلامی و ب پشتەڤانیا گرۆپێن ئیخوانی ، خوە بخوەدانێ دوزا فلستینێ و پاراستنا شکویا ئیخوانێن مسرێ ددا زانین و برێکا رێکخراو و گرۆپ و لایەن و شانەیێن چەکدارێ کار ژ پێخەمەت گەهشتن ب ئارمانجا خوە کر و کار لسەر پاراستنا دەستهەلات و بەرفرەهکرنا پەیوەندی و سنورێن خوەکر ژ پێخەمەت ئاڤاکرنا ئەوێ ئارمانجێ کو زڤراندنا خەلافەتا وەهمی یا دەولەتا عوسمانی یە لسەر کیستێ نەتەوەیێن زولملێکری .

 

ئیسلاما سیاسی یا کوردی و ئەردۆگان و زالم یاری .

 

ئێدی قەوارەیێ هەرێمێ ژی کەفتە بەر وێ لێشاوا بەرفرەهکرنا عاشقبوونا ئەردۆگانێ زالم برێکا لایەنێن ئیسلاما سیاسی و گرۆپێن دینی و ئیخوانی و رێکخراوێن خێرخازی و دەزگەهێن ڕاگەهاندنێ یێن سیبەر، و  ب پلانێن توکمە کار لسەر ڤێ جەندێ هاتە کرن تا گەهشتیە وی رادەی ئێدی حەز و ڤیان و عاشقبوونا ڤی دەستهەلادارێ زالم ببیتە جهێ شانازیێ بۆ گەنجێن کورد، و هزرا تاکێ کورد لهەمبەر دەستهەلاتدارەکێ دوژمن و فاشیست و داگیرکەر بهێتە گهورین بو رزگارکەرەکێ ئیسلامیێ دادپەروەر و حەق بێژ، وەل گەنجێ کورد کر ئێدی ل شوینا وەک تورکەکێ نەژادپەرێس و دوژمن وەک رزگارکەرەکێ ئیسلامی سەرەدەریێ دگەل ڕەوشا دەستهەلاتداریا سیاسی و ڕامیاری یا تورکیا بهێتە کرن، ددەمەکێ دا لسەر دەمێ دەستهەلاتا ڤی زالمێ کو هندەک ژ ئیسلامیێن کورد ب رزگارکەرێ ئاینێ ئیسلامێ دزانن :

ــ تورکیا ئێکەم وەلاتێ ئیسلامی یە دان ب دەولەتا ئسرائیلێ کری .

ــ مەزنترین ئالوگوریا ئابوری یا تورکیا دناڤبەرا تورکیا و ئسرائیلێ دایە .

ــ مەزنترین کارگەها کەرەستێن چەکێ ئسرائیلێ ل تورکیایە .

ــ ئەردوگان ئێکەم سەرکردێ ئیسلامی یە مەدالیا (جامێری یا ئسرائیلێ ) وەرگرتى .

ــ ئەردوگان ئێکەم سەروکێ ئیسلامی یە سەرەدانا گۆرێ (تیودۆر هێرتزل )کر کو دامەزرێنەرێ بزاڤا زایونزمێ .

ــ ژمارا وان مالێن لەشفروشی تێدا دهێت کرن ل تورکیا سالانە نێزیکی (20,000) مالانن .

ــ ئەوکەسێن کارێن لەشفروشیێ دکن پتری (30,000) کەسانن .

ــ پتری( 265) کارگەهێن مادێن کحولی ل تورکیا هەنە .

 

ئەڤە و سەدان بابەتێن دی یێن جودا هەنە مینا رێکپێدانا هاوسەرگیرییا ڕەگەزبازا بشێوەیەکێ فەرمی ل تورکیا و کومکرنا داهاتێ دەولەتێ ژ دیسکو و بار و قومارخانا، دەرێخستنا ئیخوانا و لڤێ داویێ و قەدەغەکرنا کەنال و دەزگەهێن ئیخوانا ل تورکیا ژ پێخەمەت رازیکرنا دەستهەلاتا مسرێ و ئالوگوریا گرتیێن تورکێن ئیگورێ لهەمبەر هندەک رێکەفتن و سەفقێن ئابوری دگەل وەلاتێ سینێ و هتد، کو ب ئاشکرا دسەلمینن ئەردوگان ژبلی کو دەستهەلاتدارەکێ پوپولیست و بەرژەوەندخاز و دووڕییە و دەستهەلاتا وی و پاراستنا نەژادێ تورکیا بۆ وی ل پێشەهیا هەرتشتەکێ یە و یێ ئامادەیە ژپێخەمەت ئەڤێ چەندێ دەستبەرداری هەرتشتەکێ ببت .

 

 لسەر ڤێ دووڕیاتیێ و بێ ڕەوشتیێ هەمیێ، گەنجەکێ کورد کو دیرۆکاوی و بابەتێ وی یێ نەتەوەیی و نەژادی یێ جودا ژ هەمی گەل و نەتەوەیێن دی یێن ئیسلامی دگەل تورکیا بگشتی و ئەردۆگانی هەیە، و تا نها لژێر پەردەیا ئیسلامی و خاپاندنا بیروباوەرێن دینی داکوکیێ لڤی زالمی بکت، ئەڤە لادانە ژ پرەنسیپێن ئەخلاقی و نەتەوەیی و  ئینسانی، جورەکێ کوێلاتیێ یە برێکا ئامرازێن دینی و زالم یارییە و پشگیرییە ل وێ نەژادپەرێسی و دوژمنکاری و داگیرکارییا دەولەتا تورکیا و ئەردوگانی لسەر تاک و دیرۆک و شارستانیەت و ئاخا وەلاتێ مەیێ کورد .

زێدەتر دەربارەی