عه‌لاوى: به‌رپرسێن ئیراقى كار ل سه‌ر داهێنانا شێوازه‌كێ نوى یێ گه‌نده‌لیێ دكه‌ن
بەلاڤ بکە
گاڤ
وه‌زیرێ دارایى یێ ئیراقێ یێ به‌رێ راگه‌هاند كو به‌رپرسێن ئیراقى كار ل سه‌ر داهێنانا شێوازه‌كێ نوى یێ گه‌نده‌لیێ دكه‌ن.
عه‌لى عه‌لاوى وه‌زیرێ دارایى د كابینه‌یا به‌رێ یا حكومه‌تا موسته‌فا كازمى دا د به‌یانه‌كێ دا ئاماژه دا وێ چه‌ندێ كو دێ شێوازه‌كێ نوى یێ گه‌نده‌لیێ ل ئیراقێ دیار بیت كو ب زه‌حمه‌ت ب رێكا ئالاڤێن به‌رێ بهێته ئاشكرا كرن.
عه‌لاوى د به‌یانێ دا دیاركر كو ژماره‌یه‌كا تۆمه‌تێن سه‌خته د كێشه‌یا دزیا چه‌رخى دا بۆ وى هاتینه ئاراسته‌كرن و دیاركر كو وى ب راپۆرته‌كا تێروته‌سه‌ل بۆ ده‌سته‌یا ده‌ستپاكیێ یا فیدرالى رێكارێن وه‌زاره‌تێ بۆ رێگریێ ل وى كارى دیار كرینه.
داخواز ژى كر كو دادگه‌هه‌كا نێڤده‌وله‌تى ژ بۆ لێكۆلینێ ل دۆر دزیا چه‌رخى بهێته پێكئینان و بكه‌رێن وێ سزا بده‌ت.
ناڤهاتى دیار ژى كر "شێوه‌یێ گه‌نده‌لیا نوكه یێ ئاشكرايه و ره‌نگه ب دویماهیك بهێت، لێ هنده‌ك لایه‌ن كار ل سه‌ر پێشڤه‌برنا شێوازه‌كێ نوى یێ گه‌نده‌لیێ دكه‌ن كو پتر داهاتێن حكومى تێدا بهێنه بهه‌ده‌ردان".
گۆت ژى "ده‌زگه‌هێن ده‌وله‌تێ ل ئیراقێ یێن نه‌شیاین تاوانا دزیا چه‌رخى ئاشكرا بكه‌ن ل كه‌سه‌كێ دگه‌ڕن كو تاوانێ پاڤێژنه سه‌ر ستۆیێ وى و ئه‌ز رازى نابم ببمه ئه‌و كه‌سه".
عه‌لاوى ل دۆر گه‌نده‌لیێ ل ئیراقێ زێده‌تر ژى دبێژیت "تێكچوونا كویر یا كارى ل هه‌ستیارترین پشكێن وه‌زاره‌تا دارایى یێن كارێ به‌رهه‌ڤكرنا راپۆرتان، كۆمكرنا زانیاریان و چاڤدێریێ دكه‌ن بوویه ئه‌گه‌رێ به‌لاڤبوونا ره‌فتارێن گه‌نده‌لیێ".
ل دۆر دزیا چه‌رخى دیاركر "من وه‌ك وه‌زیرێ دارایى چ كه‌مته‌رخه‌مى د كێشه‌یێ دا نه‌بوو و چ به‌هانه بۆ تۆمه‌تباركرنا من چ ب په‌راوێزكرنێ یان كێمته‌رخه‌میێ، ب ئێكسه‌ر یان نه‌ئێكسه‌ر نینن".
ئاماژه دا وێ چه‌ندێ ژى كو "ڤه‌شارتنه‌كا مه‌زن بۆ بكه‌ڕ و مفاوه‌رگرێن دزیا چه‌رخى هه‌یه و ئه‌و بكه‌ڕ ژ هه‌لگرتنا به‌رپرسیارێ و لێپرسینێ ل دۆر ڤێ تاوانێ دهێنه پاراستن".
وه‌زیرێ دارایى یێ به‌رێ هنده‌ك به‌رپرسێن مه‌زن د ده‌سته‌یا باجان دا ب هندێ تۆمه‌تباركرن كو تۆمار سه‌خته كرینه و ب ئه‌نقه‌ست فه‌رمانێن وى بۆ راوه‌ستاندنا خه‌رجكرنا كۆژمه‌یێن پاره‌ى یێن دزیا چه‌رخى ڤه‌شارتینه و زێده كر "وان وه كر كو نه‌شێم تالانكرنێ ب ئالاڤێن به‌رده‌ست ئاشكرا بكه‌م".
گۆت ژى: ده‌مێ ئه‌ز وه‌زیرێ دارایى، من به‌رده‌وام بزاڤا راوه‌ستاندنا ره‌فتارێن گه‌نده‌لیێ د وه‌زاره‌تێ دا كربوو و گه‌له‌ك جاران من نه‌رازیبوون و تێبینیێن خۆ ل دۆر هه‌ڤبه‌ست و پرۆژه‌یان دابوون.
دزيا چه‌رخى ده‌نگڤه‌دانه‌كا مه‌زن ل ئیراقێ دروستكریه كو تێدا 2.5 ملیار دۆلار ژ به‌نكا رافیده‌ین یا حكومى هاتبوونه دزین و تا نوكه ب دروستى ئه‌و كێشه‌یه ل دادگه‌هان نه‌هاتیه ئێكلاكرن.
