پشتی 33 سالێن زیندانێ، بێتاوان دەرچوو

بەلاڤ بکە

گاڤ

ل ویلایەتا کالیفۆرنیا یا ئەمریکی ل سالا 1990ێ کەسەک ب تاوانا بزاڤا کوشتنێ هاتبوو زیندانکرن و داواکارێ گشتی یێ لۆس ئەنجلس شڤێدی بێتاوانیا وی راگەهاند.

گۆرج گاسکن، داواکارێ گشتی یێ دادگەها لۆس ئەنجلس ل کالیفۆرنیا شڤێدی د کۆنگرەیەکێ رۆژنامەڤانی دا راگەهاند: زەلامەکێ 55 سالی ب ناڤێ دانیال سالدانا ل سالا 1990ێ ب تاوانا تەقەکرنێ ل نێزیک قوتابخانەیەکێ هاتبوو گرتن، لوی دەمی ژیێ وی 22 سال بوون و حوکمێ زیندانا تاهەتایێ ل سەر هاتبوو سەپاندن، لێ پشتی پێداچوون د کەیسا وی دا هاتیە کرن، بێتاوان دەرچوو.

داواکارێ گشتی یێ لۆس ئەنجلس گۆت ژی: ئەو داخوازا لێبۆرینێ ژ سالدانای دخوازن، هەرچەندە دزانن داخوازا لێبۆرینێ وان سالێن ژیێ وی بۆ وی ڤەناگەڕینیت، لێ هیڤیخوازن کو بشێت سەرژنوی ژیانا خۆ دەستپێ بکەتە ڤە.

داواکارێ گشتی د بەردەوامیا ئاخفتنا خۆ دا گۆت: سالدانا ژ ئەگەرێ شاشیەکا سیستەمی هاتبوو زیندانکرن و پشتی دویڤچوونا هویر دیاربوویە کو وی چ پەیوەندی ب رویدانێ ڤە نەبوو و ل دەما تەقە هاتیە کرن، ئەو ل جهێ رویدانێ نەبوو.

د هەمان کۆنگرەیێ رۆژنامەڤانی دا سالدانایێ 33 سالێن ژیێ وی ب غەدر د زیندانێ ڤە بۆراندین گۆت: ئەو هەرۆژ سپێدێ ژخەو رادبوو و دزانی بێتاوانە و هەر ئەو رۆژ دێ هێتە کو بهێتە ئازادکرن.

ل گۆرەی یاسایا ئەمریکا، هەر کەسەکێ ب شاشی بهێتە زیندانکرن، ماف هەیە داخوازا قەرەبۆیێ بکەت و بۆ هەر سالەکا زیندانێ د ناڤبەرا 50 بۆ 80 هزار دۆلاران دا وەربگریت.

زێدەتر دەربارەی