نه‌فه‌ره‌كى ده‌رگه‌هێ فرۆكه‌یه‌كێ ژ به‌رى دادانێ ڤه‌كر و 9 نه‌فه‌ر بۆ نه‌خۆشخانه‌یێ هاتنه ره‌وانه‌كرن
بەلاڤ بکە
گاڤ
نه‌فه‌ره‌كى ده‌رگه‌هێ فرۆكه‌یه‌كێ ل ئاسمانێ وه‌لاتێ كۆریا باشوور ژ به‌رى ل فرۆكخانه‌یێ داده‌ت ڤه‌كر و ژماره‌یه‌كا نه‌فه‌ران تووشى ئاریشه‌یێن هه‌ناسه‌دانێ بوون.
ل گۆره‌ى رێنمایێن فرۆكه‌ڤانیێ، نابیت ده‌رگه‌هێن فرۆكه‌یان ل ئاسمانى یان ژ به‌رى دادانێ بهێنه ڤه‌كرن و ئه‌ڤ چه‌نده ره‌نگه ببیته ئه‌گه‌رێ كه‌فتنا فرۆكه‌یێ و كارگێریا فرۆكه‌ڤانیا فیدرالى ل ئه‌مریكا FFA دیار دكه‌ت كو پێدڤیه رێنمایێن خۆپاراستنێ د دیزاینكرنا فرۆكه‌یان دا ل به‌رچاڤ بهێنه وه‌رگرتن دا كو رێگرى ل هندێ بهێته كرن كو كه‌سه‌ك ده‌رگه‌هێ وێ ل ئاسمانى ڤه‌كه‌ت.
كۆمپانیا ئاسیانا یا هێلێن ئاسمانى ئه‌ڤرۆ ئه‌ینیێ راگه‌هاند؛ فرۆكه‌یه‌كا كۆمپانیێ ب سلامه‌تى ل فرۆكه‌خانه‌یه‌كا باژێڕێ دێیگۆ یێ كۆریا باشوور دادا پشتى ده‌رگه‌هه‌كێ وێ ژ به‌رى ده‌مه‌كێ كێم ژ دادانێ ل فرۆكه‌خانه‌یێ ژ لایێ نه‌فه‌ره‌كى ڤه هاتیه ڤه‌كرن.
دیار ژى كر كو چ كه‌س د رویدانێ دا بریندار نه‌بوون لێ هنده‌ك نه‌فه‌ر ژ به‌ر تووشبوونا وان ب ئاریشه‌یێن هه‌ناسه‌دانێ ژ به‌ر شۆكێ ژ رویدانێ ژ بۆ نه‌خۆشخانه‌یێ هاتنه ڤه‌گوهاستن.
به‌رپرسه‌كێ به‌ڕگریا شارستانى ل دێیگۆ دیاركر؛ نه‌هـ كه‌س ژ به‌ر رویدانێ بۆ نه‌خۆشخانه‌یه‌كا نزیك هاتنه ڤه‌گوهاستن.
ئاشكرا ژى كر كو پۆلیسان لێكۆلین ل دۆر رویدانێ ده‌ستپێكرن كو تێدا نه‌فه‌ره‌كێ نزیكى ده‌رگه‌هێ هه‌وارهاتنێ یێ فرۆكه‌یێ ئه‌و ده‌رگه‌هـ ڤه‌كر.
ده‌ستهه‌لاتێن كۆریا باشوور ده‌ست ب لێكۆلینان ل دۆر بوویه‌رێ كرن و ئه‌و نه‌فه‌ره هاته ده‌سته‌سه‌ركرن.
