رۆسیا ب مووشهكان هێرش ل سهر كلینیكهكا نوشدارى كر و ژمارهیهكا كهسان بوونه قۆربانى
گاڤ
رۆسیا ئهڤرۆ ئهینیێ هێرشهكا مووشهكى ل سهر كلینیكهكا نوشدارى ل باژێڕێ دنیپرۆ ل ناڤهراستا ئۆكراینا ئهنجامدا و تێدا وهلاتیهكێ ئۆكراینى گیانێ خۆ ژدهستدا و 15 كهسێن دى بریندار بوون.
ڤولودیمیر زێلێنسكى سهرۆكێ ئۆكراینا د بهیانهكێ دا راگههاند؛ رۆسیا ب مووشهكان هێرش ل سهر كلینیكهكا نوشدارى ل باژێڕێ دنیپرۆ كر و تێدا كهسهكى گیانێ خۆ ژدهستدا و 15 كهسێن دى بریندار بوون.
سهرۆكێ ئۆكراینا گۆت ژى "تیرۆرستێن رۆسى جارهكا دى سهلماندن كو ئهو ل دژى ههر تشتهكێ مرۆڤایهتى نه".
تیمێن ههوارهاتنێ بهرهڤ جهێ رویدانێ بۆ قۆرتالكرنا كهسێن د ئاڤاهى ڤه و راكرنا پاشماوهیێن ههڕفتى ڤه چوون.
ل گۆرهى هندهك ڤیدیۆیێن د مالپهران دا هاتینه بهلاڤكرن، دویكێلهكا مهزن ژ ئاڤاهیێ كلینیكێ بلند بوو و پهنجهرهیێن وێ هاتنه شكاندن.
د دهمهكێ دى دا ژ ئهڤرۆ، رۆسیا هێرشهكا بهرفرههـ ب مووشهكان و فرۆكهیێن بێفرۆكهڤان ل سهر باژێڕێ دنیپرۆ ئهنجامدابوو.
شهڕ و پهڤچوون دناڤبهرا هێزێن رۆسى و ئۆكراینى دا ل ههرێما دونباس و رۆژههلاتێ ئۆكراینا د بهردهوامن و دهم بۆ دهمى رۆسیا هێرشێن مووشهكى و ب درۆنان ل سهر دهڤهر و باژێڕێن جودا جودا یێن ئۆكراینى ئهنجام ددهت.