كۆمبوونا په‌رله‌مانى بۆ ده‌نگدانێ ل سه‌ر بودجه‌یێ سوبه‌هى ناهێته‌ كرن

بەلاڤ بکە

 

گاڤ

روینشتنا په‌رله‌مانێ ئیراقێ بۆ ده‌نگدانێ ل سه‌ر پرۆژه‌یاسایا بودجه‌یێ سوبه‌هى شه‌مبیێ برێڤه‌ناچیت و بۆ ده‌مه‌كێ نه‌ده‌ستنیشانكرى هاته‌ پاشئێخستن.
شاخه‌وان عه‌بدوللا جێگرێ سه‌رۆكێ په‌رله‌مانێ ئیراقێ ل سه‌ر ئه‌نجامدانا روینشتنا په‌رله‌مانى سوبه‌هى شه‌مبیێ بۆ ده‌نگدانێ ل سه‌ر بودجه‌یێ رازى نه‌بوو و روینشتن بۆ ده‌مه‌كێ نه‌ده‌ستنیشانكرى هاته‌ پاشئێخستن.
لژنه‌یا دارایى یا په‌رله‌مانێ ئیراقێ دوهى پێنجشه‌مبیێ مادده‌یێن 13 و 14 ژ بودجه‌یا ئیراقێ یێن گرێداى پشكا هه‌رێما كوردستانێ ب گوهۆڕین ڤه‌ په‌سه‌ندكربوون و ژماره‌یه‌كا په‌رله‌مانتارێن كورد كۆمبوونا په‌رله‌مانى ب جهـ هێلابوون.
د كۆمبوونا دوهى دا بڕیار هاتبوو‌ دان كو شایسته‌یێن دارایى یێن هه‌رێما كوردستانێ هینگێ دێ هێنه‌ هنارتن ده‌مێ حكومه‌تا هه‌رێمێ په‌ترۆلێ ره‌وانه‌ دكه‌ت هه‌روه‌سا ڤه‌كرنا ژماره‌یا به‌نكى دێ ژ ده‌ستهه‌لاتێن تایبه‌ت یێن وه‌زاره‌تا دارایى یا ئیراقێ بیت، زێده‌بارى وێ چه‌ندێ، حكومه‌تا هه‌رێمێ هاتبوو‌ پێگیركرن كو د هه‌ر حاله‌ته‌كێ نه‌شیانا وێ بۆ به‌رهه‌مئینانا په‌ترۆلێ دا، په‌ترۆلێ راده‌ستى سومۆ بۆ به‌رهه‌مئینانا ناڤخۆیى بكه‌ت.
هه‌روه‌سا لژنه‌یا دارایی حكومه‌تا هه‌رێمێ پێگیر كربوو كو هه‌یڤانه‌ 10% یا پاشكه‌فتێ مووچه‌یێ فه‌رمانبه‌رێن هه‌رێمێ بده‌ت.
د ده‌مه‌كێ دى دا ژ ئه‌ڤرۆ ئه‌ینیێ، حكومه‌تا هه‌رێما كوردستانێ راگه‌هاند بوو كو ئه‌و گوهۆڕێنێن دوهى پێنجشه‌مبیێ د پرۆژه‌یاسایا بودجه‌یا ئیراقێ دا هاتینه‌ كرن د نه‌ده‌ستوورى نه‌ و ئه‌و پێگیریێ پێ ناكه‌ت.
دیار ژى كربوو كو ئه‌و گوهۆڕین ل دژى رێككه‌فتنا حكومه‌تا هه‌رێمێ و حكومه‌تا فیدرالى هه‌روه‌سا دژى پره‌نسیپێن رێككه‌فتنا حكومه‌تا برێڤه‌برنا ده‌وله‌تێ و به‌رنامه‌یێ وێ كابینه‌یێ یه‌ كو د په‌رله‌مانى دا ده‌نگ ل سه‌ر هاتیه‌ دان.
حكومه‌تا هه‌رێمێ خۆیا كربوو كو ب چ شێوه‌یان ئه‌و ڤێ سته‌مكاریێ و پنپێكرنا مافێن خه‌لكێ كوردستانێ قه‌بویل ناكه‌ت و پێگیریێ ب چ بڕیارێن دى ناكه‌ت ژبلى وێ رێككه‌فتنا ژ به‌رى نوكه‌ یا ل گه‌ل حكومه‌تا سوودانى هاتیه‌ كرن.
محه‌مه‌د حه‌لبووسى سه‌رۆكێ جڤاتا نوینه‌رێن ئیراقێ ژ به‌رى نوكه‌ راگه‌هاند بوو كو ل رۆژا شه‌مبیێ دێ ده‌نگدانا په‌رله‌مانتاران ل سه‌ر بودجه‌یێ ده‌ستپێكه‌ت.
په‌رله‌مانێ ئیراقێ ل رۆژا 5/4/2023 خواندنا ئێكێ بۆ بودجه‌یا ئیراقێ یا سالێن 2023، 2024 و 2025 ئه‌نجامدابوو و ل رۆژا 17/4/2023 خواندنا دوێ بۆ بودجه‌یێ ته‌مامكربوو.


 

زێدەتر دەربارەی