جاسم سه‌برى

دونیا ئەو جیهانا بچویک د دەستێ مەدییایێ دا و ئامرازێن پێشکەفتیێن راگەهاندنێ وەکریە دزویترین دەمدا هەر بویەر و ڕویدانەکا ل هەرجهەکێ دونیایێ ڕویبدەت ئەم بشێوەیەکێ ئێکسەر ببینن یان بشێوەیەکێ بلەز بگەهینە راستیا ڕویدانێ ، لێ جودا ژڤێ چەندێ مخابن ئەم خەلکێ کوردستانێ هندەک تەنگاسیان دڤێ چەندێ دا دبینن هەتا بگەهین راستیا بابەتان ، ژبەر کو مە فەوجەکا روژنامەیان و کومارەکا تیڤیان و باژێرەکێ ڕادیو و مالپەر و دیجیتال مەدییایێن ئەلیکترونی هەیە و هەرئێک ژڤان لژێر فشارێن ئایدولوژیەکێ و حزبەکێ و کەسایەتیەکێ سیاسی و بزنزمان ڕویدانا پەخش دکەن و ئاستێ چەواشەکاریا بینەر و بیسەر و خواندەڤانێن میدییایا کوردی گەهشتیە وی رادەی ئێدی باوەری دناڤبەرا خەلکێ و مەدییایا کوردی دا نەمایە ، گەلەک جاران ئێک ڕویدان چ لسەر ئاستێ ناڤخوە یان دەرەکی بچەندین شێوازێن جودا جودا د مەدییایا کوردیدا دهێتە پەخش کرن و هەر دەزگەهەک لدیڤ حەزا خوە خواندنێ ددەتە ڕویدانێ و خەلک دێ کەڤیتە دوودلیێ و بزەحمەتە بگەهیتە راستییا بابەتی ، ئەڤەژی بو وێ چەندێ دزڤریت یاسایا کارێ روژنامەڤانی بدروستی لڤێرێ ناهێتە جێبەجێکرن و بسەدان مالپەرێن وەهمی د سوشیال میدیایێ دا کاردکەن بێ مولەت و سەروشوێنن روژانە هەوالێن بێ بنەما بەلاڤ دکەن و چەواشەکاریێ دکەن و مەدییایا بازرگانی ئەڤا بتنێ کارێ مەدییایی وەک بزنز دبینیت و دیر ژ ئەتێتێن روژنامەڤانی بشێوەیەکێ نەبەرپرسیارانە کاردکەت و ململانا دژوارا حزبی ژی وەکریە پتریا کەنالێن کوردی سیبەربن و ڕویدانا دبەرژەوەندا حزبا خوە دا پەخش بکەن هتد .... وەکریە ئێدی بینەرێ کورد نەگەهیتە راستیا وان بویەر و ڕویدانێن دبنە روژەڤ دژیانا مەدا و ئاستێ باوەریێ دناڤبەرا میدییا کوردی و بینەرێ وێ دا بگەهیتە خالا سفرێ .

هەر ژ ڕاگەهاندنا خشتەیێ موچەیی بگرە تا دگەهیتە پرسێن ئاسایشا نەتەوەیی چەواشەکاری و درەو جهێ خوە دمەدییایا کوردی دا دکەت .

ئەڤەژی فەوزایەکا ئالوز دجادەیا کوردی دا پەیدادکەت ،

گەلەک فەرە دیڤچون بو وان سایت و مالپەرێن وەهمی بهێتەکرن و بهێنە ژناڤبرن و یاسایا کارێ روژنامەڤانی و رێکخراو و سەندیکایێن کارێ روژنامەڤانی کار لسەر هندێ بکەن هەر دەزگەهەکێ چەواشەکاریێ بکەت بدەنە دەست دادگەهێ و نەهێلن دەستێن تێکدەر و چەواشەکار جهێ خوە د مەدییایا کوردی دا بکەن دا جارەکادی باوەریا دناڤبەرا بینەر و بیسەر و خواندەڤانێن مەدییایا کوردی بزڤرینن ، ئەزدێ ڤێ گوتارێ ب گوتنەکا مەزنە نڤیسکارێ ئیتالی ماکیافیللی بدۆماهیک ئینم دبت مەرەم ژڤێ گوتنێ پتر سیاسی بت لێ تەمام لسەر مەدییایا کوردی دگونجیت دەمێ دبێژیت (نە مەرجە ئەو وێنەیێن ئەم دبینن راست بن یان خواندنامە بو وان ڕویدانێن رویددەن دروست بیت ، دبیت ل پشت وان وێنەیان هندەک وێنەیێن دی هەبن یان هندەک مەبەستێن دی لپشت وان ڕویدانان ڤەشارتی بن).