مازن شنگالى

د ئەڤێ هەڤکێشەیا نوکە ئێراق ب گشتی تێدا دەرباز دبیت نە پڕانی دخۆت و نە مێرانی، بەلکو ژیر و زانابوون د پەیوەندییان و سەرەدەریکرنێ دا و دویربینی و دارشتنا پلان و بەرنامەیێن دۆمدرێژ ئەڤە بتنێ دبنە ئەگەرێن سەرکەفتن و پاراستنا دەستکەفتان چ زوی یان ژی د پێشەرۆژێ دا.
لسەردەمێ رژێما ژناڤچووی دا خالا هەری بهێز یا شوڕه‌شا کوردان ل دژی ئەوێ رژێمێ ئێکرێزییا کوردان بوو ژ روویێ سیاسی و سەربازی ڤە و ئەڤێ چەندێ ژی پتریا شوڕەشێن کوردان بسەرئێخستن و هەمی ئالی ل ئیراقێ ب کورد و غەیری کورد ژی ڤە دیدەڤانیێ بۆ ئەڤێ چەندێ ددەن.
پشتی سالا 2003یێ و ژناڤچوونا رژێما بەعس، دەستهەلاتێن ئێک لدویڤ ئێک یێن ئیراقێ سەرێ کوردان نەڤیاینە نە سیاسی و نە هەڤپشکی و نەژی نەتەوەیی، و بەردەوام کار لسەر ئێک خالێ کرینە ئەوژی تێکدانا ئێکرێزیا ناڤمالا کوردان و پرت و بەلاڤکرنا وانا بسەر بۆچوون و ئارمانجێن جودا دا بتنێ دا لاواز ببن و کۆنترۆلكرنا وان یا ئاسان بیت.
کوردان ژی هندی هاریکار بووینە بۆ ئەڤان کار و کریارێن ئیراقێ و دژایەتیا ئێکودوو کرینە، هند دژایەتیا ئەڤان پلان و پیلانێن ئیراقێ نەکرینە و ژبەر ئەڤێ چەندێ ژی ئیراقێ هەتا ئەڤێ گاڤێ ژی شیایە کوردان لاواز بکەت و بەردەوام کوردا بکەتە د چارچۆڤەیێ بەرەڤانیکرنێ ژخۆ نەک هێرشبرنێ .
د نوکە دا کورد یێ ل قۆناغەکێ خۆ بۆ ئەوان مافێن کوردان یێن د دەستووری ژی دا پێ ڕەوا ناهێنە دیتن و بزاڤێن نەهێلانا قەوارەیێ هەرێمێ ژی دهێنەکرن، ئەڤە هەمی بۆ ئەوێ چەندێ دزڤریت کو کورد ل هەرێمێ ب دژایەتیا ئێک و دو ڤە د مژیلن و ئیراق ژی بدلێ خۆ راست و چەپ ل دژی کوردان بریاران ددەت و یاسایان دەردئێخیت و راستڤەدکەت.
ژبەر ئەڤێ چەندێ ژی ئەگەر ئالیێن سیاسی یێن کورد ل هەرێمێ و بتایبەتی ژی پارتی و ئێکەتی پێداچوونەکێ د سەرەدەری و سیاسەتا خۆ دگەل ئێک دا نەکەن پێدڤیه‌ چاڤەرێی کار و بریار و یاسایێن گەلەک دژوارتر بن ل دژی کوردان و کوردستانێ.
د نوکە دا شیعەیان کۆنترۆلا پتریا سەرێن دەستهەلاتا سیاسی و یاسایی و دادوەری گرتینە دەست خۆ و ئەڤانا هەمیان ژی هندی کو بۆ دژایەتیا کوردان بکاردئینن هند بۆ بەرژەوەندیا خۆ بکارنائینن و دڤێت کورد ئەڤێ راستیێ قەبیل بکەن و بزانن چەوا سەرەدەریێ دگەل دا بکەن .
خالا لاواز یا کوردان ئەوە کو دژی هەڤن و نە ئێکرێزن و ئەڤە ژی دبیتە ئەگەرێ وێ چەندێ ب ساناهی هەر ئالیەکێ بڤێت دەستێ خۆ بکەتە دناڤدا و هەر پلان و پیلان و بەرنامەکێ کوردان هەبیت ژناڤ ببەن.
دەلیڤە مایە كورد ببنە یەک كو بەری دەستکەفتێن خۆ ژدەست بدەین یەک لدویڤ یەک.