راهێنهرێ بهرشلۆنا: مه پێدڤى ب كڕینا شهش یاریكهرایه بۆ بدهستڤهئینانا چامپیۆنز لیگێ
گاڤ
راهێنهرێ بهرشلۆنا دیاركر كو یانه پێدڤى ب كڕینا شهش یاریكهرایه بۆ بدهستڤهئینانا چامپیۆنز لیگا سالا بهێت و راگههاند ژى كو مێسى د حهفتیا بهێت دا دێ بڕیارێ ل دۆر پاشهرۆژا خۆ دهت.
ههڤبهستا لیۆنێل مێسى ل گهل پاریس سان جێرمان ب دویماهیك هاتیه و تا نوكه وى بڕیارا ئێكلاكهر ل دۆر چارهنڤیسێ خۆ نهدایه و ژمارهیهكا یانهیان ژ وان ژى بهرشلۆنا، هیلال و ئینتر مایامى بزاڤێن ڤهگوهاستنا وى بۆ دناڤ رێزێن خۆ دا دكهن.
چاڤى هێرناندێز ئهڤرۆ ئهینیێ بۆ رۆژنامهیا موندۆ دێپۆرتیڤۆ راگههاند "لیۆنێل مێسى دێ د حهفتیا بهێت دا بڕیارێ ل دۆر پاشهرۆژا خۆ دهت، دهرگههێن یانهیێ بۆ وى د ڤهكرینه و دێ شێت هاریكاریا مه كهت".
ل دۆر چهنسێ یانهیێ بۆ بدهستڤهئینانا ناسناڤان ل سالا بهێت، چاڤى ئاماژه ب وێ چهندێ كر كو وان پێدڤى ب كڕینا 6 یاریكهرایه ئهگهر وان بڤێت چامپیۆنز لیگێ بدهستڤهبینن و گۆت ژى "گهلهك یاریكهران دڤێن بهێنه دناڤ رێزێن بهرشلۆنا دا، من ل گهل گهلهك یاریكهران ئاخفتیه و ههمیان گۆتینه كو تشتهكێ گهلهك خۆشه یاریێ بۆ بهرشلۆنا بكهن".
سهبارهت رهوشا دارایى یا یانهیێ دیاركر؛ جهماوهر داخوازا بدهستڤهئینانا چامپیۆنز لیگێ و خۆلا ئسپانیا دكهن، لێ ئهم ژ لایێ ئابوورى ڤه نه ل ئاستێ یانهیێن دى یێن وهكى مانچستهر ستى، بایرن میۆنج، ریال مهدرید و یۆڤێنتۆسین.
چاڤى ئاماژه ب وێ چهندێ ژى كر كو ئهو ژ نویكرنا ههڤبهستا خۆ ل گهل یانهیا بهرشلۆنا یێ پشتراسته.