زانایێن بریتانى لێكۆلینان ل سه‌ر ژنه‌كێ دكه‌ن كو تووشى ئێشانان نابیت
بەلاڤ بکە
گاڤ
زانایێن بریتانى یێن كولیژا له‌نده‌ن لێكۆلینان ل سه‌ر ژنه‌كا سكوتله‌ندى ئه‌نجامدده‌ن كو تووشى ئێشانان نابیت به‌روڤاژى مرۆڤێن دى.
ل گۆره‌ى لێكۆلینه‌كا بریتانى یا نوى یا د كۆڤارا بره‌ین دا به‌لاڤبووى "ژنه‌كا 75 سالى ب ناڤێ جۆ كامیرۆن د درێژیا ته‌مه‌نێ خۆ دا چ جاران هه‌ست ب ئێشانێن مه‌زن یێن له‌شى نه‌كریه، هه‌تا د ده‌مێ نشته‌رگه‌یا مه‌زن و ژدایكبوونێ ژى دا، ئێشانا وێ ل وى ئاستى بوو وه‌كى ژنێن دى".
هه‌روه‌سا ئاماژه ب وێ چه‌ندێ كریه كو ژماره‌یه‌كا كێم یا كه‌سان ل جیهانێ ئه‌ڤ حاله‌ته ل ده‌ف هه‌یه كو دبێژنێ ئازارشكاندنا زكماكى كو ئه‌گه‌رێن بوماوه‌یى رۆل تێدا هه‌یه و ره‌نگه هنده‌ك نیشان ل گه‌ل هه‌بن وه‌كى خۆهدان یان نه‌مانا هه‌ستا بێهنكرنێ.
"زانایێن كولیژا له‌نده‌ن یا زانكۆ لێكۆلینان ل سه‌ر جینێن كامیرۆنێ دكه‌ن دا كو بگه‌هنه چه‌وانیا راوه‌ستاندنا ئاراسته‌یێن ئێشانێ ل ده‌ف وان مرۆڤان یێن ئێشانێن هه‌روهه‌ر ل ده‌ف هه‌ین"، ل گۆره‌ى مالپه‌رێ ساینس ئه‌لێرت.
ئێشان هنده‌ك جاران پیڤه‌ره‌كێ باشه بۆ دیاربوونا وێ زیانا ب له‌شى گه‌هشتى، لێ ئێشانێن چه‌ند هه‌یڤان به‌رده‌وام دبن دبنه پرسگرێك بۆ مرۆڤان و لێكۆله‌ر بزاڤان دكه‌ن ب رێكا لێكۆلینێ ل سه‌ر جینێن وێ ژنێ، بگه‌هنه نهێنیا راوه‌ستاندنا ئێشانان.
جێمس كوكس زانایێ بوماوه‌زانیا ئێشانێ ل كولیژا له‌نده‌ن د ڤى وارى دا دبێژیت "زانینا ئه‌و تشتێ د له‌شێ وێ ژنێ دا هه‌ى دێ ژ بۆ تێگه‌هشتنا بابولوژیایا وێ هاریكار بیت و ئه‌ڤ تشته دێ رێكێ بۆ ڤه‌دیتنا ده‌رمانێن كارتێكرنێن باش ل سه‌ر نه‌خۆشان هه‌ین، ڤه‌كه‌ت".
