ناڤێن وهزیرێن حكومهتا نوى یا توركیا هاتنه راگههاندن
گاڤ
سهرۆككۆمارێ توركیا پشتى سویندخوارنا یاسایى بهرى دهمهكێ كێم كابینهیا نوى یا حكومهتا توركیا راگههاند و سهرۆكێ ههوالگیریا توركیا وهك وهزیرێ دهرڤه دهستنیشانكر.
رهجهب تهیب ئهردۆگان ناڤێن ههر 17 وهزیرێن كابینهیا حكومهتێ راگههاندن و جهودهت یێلماز وهك جێگرێ سهرۆككۆمارى هاته دانان.
هاكان ڤیدان سهرۆكێ دهزگههێ ههوالگیریا توركیا وهك وهزیرێ دهرڤه هاته دانان، یهشار گولهر بوو وهزیرێ بهرگریێ و عهلى یارلى كایا پۆستێ وهزیرێ ناڤخۆ وهرگرت.
وهزیرێن دى ئهڤێن ل خوارێ نه: یێلماز توونج- وهزیرێ داد، ماهینۆر ئوزدهمیر گوگتاش- وهزیرێ كاروبارێن جڤاكى و خێزانێ، ڤێدات ئشكهان- وهزیرێ كار و بیمهیا جڤاكى، محهمهد ئوزههسهكى- وهزیرێ ژینگههـ و باژێڕڤانیێ، عوسمان ئاشكن باك- وهزیرێ وهرزش و لاوان، ئالپارسلان بایراكتار- وهزیرێ وزه و سامانێن سرۆشتى، محهمهد شیمشهك- وهزیرێ دارایى، محهمهد نوورى- وهزیرێ كولتۆر و گهشتوگۆزارێ، یووسف تهكین- وهزیرێ پهروهردێ، فهخرهدین كۆچا- وهزیرێ ساخلهمیێ، محهمهد فاتیح كاجر- وهزیرێ پیشهسازى و تهكنولوژیایێ، عومهر بۆلات- وهزیرێ بازرگانیێ، عهبدولقادر ئورالئوغلۆ- وهزیرێ ڤهگوهاستن و گههاندنێ و ئیبراهیم یوماكلى- وهزیرێ چاندن و دارستانان.
ل گۆرهى گوهۆڕینێن دهستوورى یێن ل ههیڤا نیسانا سالا 2017 هاتینه پهسهندكرن، ژمارهیهكا دهستههلاتان ب سهرۆككۆمارێ توركیا هاتینه دان وهكى سهرۆكێ دهستههلاتا بجهئینانێ و دامهزراندنا وهزیران و مهزنه بهرپرسێن دهولهتێ یان ژكارلادانا وان.