گاڤ

وه‌زاره‌تا ساخله‌میا ئیراقێ ره‌تكر، به‌لاڤبوونا تایا خوینبه‌ربوونێ ل ئیراقێ ژ كۆنترۆلێ ده‌ركه‌ڤتبیت و ئاشكراكر، ره‌وش ل ژێر كۆنترۆلێ یه‌.

وه‌زاره‌تا ساخله‌میا ئیراقێ ئه‌ڤرۆ چارشه‌مبێ 7-6-2023یێ د راگه‌هاندنه‌كێ دا دیاركر، سازیێن وان د شێن هه‌موو په‌ژیكان كۆنترۆل بكه‌ن و د چارچۆڤێ پلانا ساخله‌میێ دا تایا خوینبه‌ربونێ ژى ل ژێر كۆنترۆلێ یه‌ و ژ ده‌ستێن وان ده‌رنه‌كه‌فتى یه‌.

هه‌روه‌سا دیاركر، ژبه‌ر گرتنه‌به‌را رێكاران ب هه‌ڤبه‌ركرن ل گه‌ل سالا بۆرى 25%ێ مرن ب ڤێ نه‌خۆشیێ كێمكریه‌ و پێدڤیه‌ وه‌لاتى و ب تایبه‌ت ئه‌وێن سه‌ره‌ده‌ریێ ل گه‌ل ئاژه‌لى دكه‌ن خۆ ب پارێزن و رێنمایان بجهـ بینن.

دوهى گەنجەکێ 27 سالی یێن خەلکێ باشیکێ ل نەخۆشخانا ئازادی وەغەر کر و گومان هەیە تووشبوویێ تایا خوینبەربوونێ بیت.

د. ئەڤراسیاب مووسا، رێڤەبەرێ گشتیێ ساخلەمیا دهۆکێ بۆ گاڤ گۆت: ئەو گەنجە خەلکێ باشیکێ یە، دوهى بەری نیڤرۆ ل نەخۆشخانا ئازادی وەغەر کر و هەموو نیشانێن نەخۆشیا تایا خوینبەربوونێ ل دەف هەبوون.

هەروەسا گۆت: پشکنینێن وی بۆ بەغدا هاتینە هنارتن و 3 تا 4 رۆژێن دی دێ ئەنجامێن پشکنینێ دەرکەڤن.