جڤاتا وەزیران ئەڤرۆ دێ بابەتێن هنارتنا پەترۆلا و بودجێ بەحس کەت
گاڤ
جڤاتا وەزیرێن هەرێما کوردستانێ ئەڤرۆ دێ ب سەرپەرشتیا مەسروور بارزانی، سەرۆکێ حکومەتا هەرێما کوردستانێ و ب بەرهەڤبوونا قوباد تالەبانی، جێگرێ سەرۆکێ حکومەتێ کۆم بیت.
ل گۆرەی بەیانەکا فەرمانگەها میدیا و زانیاری یا حکومەتا هەرێما کوردستانێ، د کۆمبوونا ئەڤرۆ دا دێ دوماهی پێشهاتێن پرۆژەیاسایا بودجەیا ئیراقێ بۆ سالێن 2023، 2024 و 2025 و بابەتێ هنارتنا پەترۆلا هەرێما کوردستانێ بەحس کەن.
هەروەسا هاتیە، د تەوەرێ دویێ دا دێ دارشتنا کۆدێ بیناسازیێ ل هەرێما کوردستانێ و رێنمایێن نوی یێن وەزارەتا باژێرڤانی بۆ پلانسازیێ و تۆمارکرنا ئەلکترۆنی یا مولک و مالێ دەولەتێ ژی بەحس کەن.
تەوەرێ سیێ ژی دێ تایبەت بیت ب بجهئینانا بریارا پێشتر یا جڤاتا وەزیران دەربارەی دیاردەیێن سیمکارتێن نەتۆمارکری، ترۆمبێلێن نەتۆمارکری و چەکێ بێ موولەت بیت.
د تەوەرێ دوماهیێ ژی دا دا بابەتێ دەستنیشانکرنا قەدەغەکریێ رێکێن گشتی ل دەرڤەیی باژێران و نەهێلانا زێدەگاڤیان بەحس کەن.