ناڤهڕۆكا كۆمبوونا ئهڤرۆ یا جڤاتا وهزیرێن ههرێما كوردستانێ
گاڤ
جڤاتا وهزیرێن ههرێما كوردستانێ كۆمبوو و داخواز ژ ههموو فراكسیۆنێن كوردستانى ل جڤاتا نوونهرێن ئیراقێ كر، كارى بۆ دهستهبهركرنا مافێن خهلكێ ههرێما كوردستانێ ل بهغدایێ بكهن.
ئهڤرۆ چارشهمبێ 7-6-2023یێ ب سهرپهرشتیا سهرۆكوهزیران، مهسروور بارزانى و جێگێرێ سهرۆكوهزیران، قوباد تالهبانى جڤاتا وهزیران كۆمبوو.
د برگا ئێكێ یا كۆمبوونێ دا سهرۆكوهزیران رۆناهى خسته سهر دوماهى پێشهاتێن پڕۆژهقانوونا بودجهیا ئیراقێ بۆ سالێن 2023 تا 2025ێ و بابهتێ بزاڤێن دهستپێكرنا هنارتنا پهترۆلا ههرێما كوردستانێ د چارچۆڤێ رێككهفتنا ناڤبهرا حكومهتێن ههرێم و فیدرال دا هاتیه ئیمزاكرن.
جڤاتا وهزیران پشتتهڤانیا خۆ بۆ رێككهفتنا د ناڤبهرا حكومهتا ههرێمێ و حكومهتا ئیراقێ ل سهر بودجهیى دوپاتكر كو دهرئهنجامێ دانوستاندنێن هوور و ل سهر بنهمایێ قانوونى و زانستیانه و دادپهروهریانه بوو، ژبهر ڤێ یهكێ داكۆكى ل سهر دهستهبهركرنا مافێن دهستوورى و مافێن دارایى یێن خهلكێ ههرێما كوردستانێ دكهت.
جڤاتا وهزیران داخواز ژ ههموو فراكسیۆنێن كوردستانى ل جڤاتا نوونهرێن ئیراقێ كر ب ههڤكارى و بۆ ئێكرێزى و بهرگریكرن ژ مافێن دهستوورى و دارایى یێن ههرێمێ د ناڤا پڕۆژهقانوونا بودجهیا ئیراقێ دا كارى بكهن.
د برگا دووێ یا كۆمبوونا جڤاتا وهزیران دا ساسان عهونى، وهزیرێ باژێڕڤانى و گهشتوگۆزارا ههرێمێ راپۆرتهكا تژى زانیارى دهربارهیى دارشتنا كۆدێ ئاڤاكرنێ ل سهرانسهرى ههرێمێ و رێنمایێن نوو یێن وهزارهتا باژێڕڤانى و گهشتوگۆزارێ بۆ پلانسازیێ و تۆماركرنا ئهلكترۆنى یا مولك و مالێ دهولهتێ ل ههرێما كوردستانێ دیاركر.
ژ ئالیێ خۆ ڤه رێبهر ئهحمهد، وهزیرێ ناڤخۆیێ ههرێمێ بهحس ل بجهئینانا بڕیارێن حكومهتێ كر و گۆت: دوماهى ژڤان بۆ تۆماركرنا چهكى دوماهیا مهها حهفته و ژ وى دهمى و پێدا دێ ل گۆرى قانوونێ سهرهدهرى ل گهل وان هێتهكرن یێن چهك رادهست نهكرین.
ل دوماهیا كۆمبوونێ جڤاتا وهزیران بڕیار ل سهر راسپاردنا ههر دو وهزیرێن ئاڤهدانكرن و ئاكنجیكرنێ و ناڤخۆ دا كو بهردهوام بن ل گهل بهرپرسێن یهكهیێن ئیدارى بۆ وێ یهكێ كار ب باشى ب رێڤهبچیت و ههر زێدهگاڤیهك ل سهر رێكێن گشتى هاتبینه كرن سهرپێشكاران همبهرى دادگههێ بكهن و رێكارێن قهزایى ل همبهر بگرنه بهر.
ل دۆر ههلبژارتنا سهرۆككۆمارێ توركیا و دهستبكاربوونا كابینهیا نوو، جڤاتا وهزیران پیرۆزباهى ل سهرككۆمارێ توركیا، رهجهب تهیب ئهردۆگان و تهڤایا ئهندامێن كابینهیا نوو یا حكومهتا توركیا كر.