"ئه‌گه‌ر بودجه تا ده‌مژمێر 12ى شه‌ڤێ نه‌هێته په‌سه‌ندكرن دێ پرسگرێكه‌كا یاسایى رويده‌ت"
بەلاڤ بکە
گاڤ
ب تنێ دو ده‌مژمێر بۆ په‌سه‌ندكرنا پرۆژه‌یاسایا بودجه‌یا گشتى یا ئیراقێ ماینه و ئه‌گه‌ر تا ده‌مژمێر 12ى شه‌ڤێ نه‌هێته په‌سه‌ندكرن دێ پرسگرێكه‌كا یاسایى په‌یدا بیت.
به‌رى ده‌مه‌كێ كێم كۆمبوونا لژنه‌یا دارایى ب ئاماده‌بوونا سه‌رۆكاتیا په‌رله‌مانى بۆ گه‌نگه‌شه‌كرن و ده‌نگدانێ ل سه‌ر بودجه‌یێ ده‌ستپێكر و تا نوكه ژڤانێ ده‌نگدانا په‌رله‌مانى ل سه‌ر ب دروستى نه‌هاتیه دیاركرن و ژێده‌ره‌ك دیار دكه‌ت كو ئه‌گه‌ر تا ده‌مژمێر 12ى شه‌ڤێ بودجه نه‌هێته په‌سه‌ندكرن، دێ پرسگرێكه‌كا یاسایى په‌یدا بیت.
ئاژانسا شه‌فه‌ق نیوز به‌لاڤكریه؛ هه‌ر ژ ده‌مژمێر 12ى ئه‌ڤ شه‌ڤه دێ بێهنڤه‌دانا یاسادانانێ یا په‌رله‌مانێ ئیراقێ ده‌ستپێكه‌ت و ژ به‌ر ڤێ چه‌ندێ دێ پێدڤى ب روینشتنه‌كێ بۆ بڕیاردانێ ل سه‌ر درێژكرنا ده‌مێ یاسادانانێ بۆ هه‌یڤه‌كا زێده‌تر بیت.
دیار ژى كریه؛ هه‌ر روینشتنه‌كا په‌رله‌مانى ل پشتى ده‌مژمێر 12ى شه‌ڤێ دێ بیته پرسگرێكه‌كا یاسایى و دێ د شیان دا بیت پاشى تانه ل شه‌رعیه‌تا وێ بهێته دان چونكى په‌رله‌مان ل وى ده‌مى دچیته د بێهنڤه‌دانا خۆ یا یاسادانانێ دا.
وێ ئاژانسێ هه‌روه‌سا ژ هنده‌ك ژێده‌ران ڤه‌گوهاستیه "ئاریشه‌یه‌كا دى ژى هه‌یه، ئه‌و ژى 80 په‌رله‌مانتاران دڤێن د ده‌مێ بێهنڤه‌دانا په‌رله‌مانى دا بچنه حه‌جێ و ره‌نگه ئه‌گه‌ر ده‌مێ یاسادانانێ یێ په‌رله‌مانى بۆ هه‌یڤه‌كا دى بهێته درێژكرن، د روینشتنا په‌رله‌مانى دا ئاماده نه‌بن و روینشتنێن په‌رله‌مانى بۆ پشتى جه‌ژنا قۆربانێ بهێنه پاشخستن".
بێهنڤه‌دانا یاسادانانێ یا په‌رله‌مانێ ئیراقێ بۆ ده‌مێ هه‌یڤه‌كێ یه و ژ 9/6/2023 ده‌ستپێدكه‌ت تا كو 9/7/2023.
