نزيكى 144 هزار گه‌شتیاران د رۆژێن جه‌ژنێ دا سه‌ره‌دانا پارێزگه‌ها هه‌ولێرێ كرینه‌

بەلاڤ بکە

 

گاڤ

پارێزگه‌ها هه‌ولێرێ ئه‌ڤرۆ ئێكشه‌مبیێ ئامارێن جودا جودا یێن رۆژێن جه‌ژنا قۆربانێ به‌لاڤكرن و ئاماژه‌ دایه‌ سه‌ره‌دانا نزيكى 144 هزار گه‌شتیاران بۆ پارێزگه‌هێ د وان رۆژان دا.
پارێزگه‌ها هه‌ولێرێ د به‌یانه‌كێ دا ئامارێن گه‌شتیاران، تاوانان، رویدانێن هاتنوچوونێ، سۆتنان و چوونا بۆ نه‌خۆشخانه‌یان د چار رۆژێن جه‌ژنا قۆربانێ دا به‌لاڤكرن.
ل گۆره‌ى به‌یانێ؛ 143 هزار و 921 گه‌شتیاران د رۆژێن جه‌ژنێ دا سه‌ره‌دانا پارێزگه‌ها هه‌ولێرێ كرینه‌.
هه‌روه‌سا 35 تاوان د رۆژێن جه‌ژنێ دا ل هه‌ولێرێ رویداینه‌ و ل گۆره‌ى به‌یانا پارێزگه‌هێ؛ هێزێن پۆلیسان 26 ژ وان ئاشكرا كرینه‌ و 9 تاوانێن دى لێكۆلین ل دۆر وان به‌رده‌وامه‌.
ل دۆر رویدانێن هاتنوچوونێ ئاماژه‌ ب وێ چه‌ندێ دایه‌؛ د رۆژێن جه‌ژنێ دا 8 رویدانێن هاتنوچوونێ هاتینه‌ تۆماركرن كو ژ به‌ر له‌زاتیێ بوون و تێدا كه‌سه‌كى گیانێ خۆ ژده‌ستدایه‌ و 8 كه‌س بریندار بووینه‌.
هه‌روه‌سا د رۆژێن جه‌ژنێ دا ل هه‌ولێرێ 9 حاله‌تێن سۆتنان، حاله‌ته‌كێ نقۆمبوونێ و دو حاله‌تێن رزگاركرنێ ژ نقۆمبوونێ هه‌بوون.
نه‌خۆشخانه‌یێن هه‌ولێرێ د رۆژێن جه‌ژنێ دا پێشوازى ل 5 هزار و 515 حاله‌تێن نه‌خۆشیان كرینه‌ و ژ وان ژى حاله‌ته‌كێ تووشبوونێ ب تایا خوینبه‌ربوونێ بوو.

زێدەتر دەربارەی